Sunday, June 27, 2010

വരൂ, ഈ തെരുവുകളിലെ രക്തം കാണൂ

ചില കാര്യങ്ങളുടെ വിശദീകരണം
പാബ്ലോ നെരൂദ

നിങ്ങൾ ചോദിക്കുന്നു:
എന്തു കൊണ്ടാണ് അവന്റെ കവിത
ഇലകളെയും കിനാവുകളെയും
ജന്മ നാട്ടിലെ കൂറ്റൻ അഗ്നിപർവ്വതങ്ങളെയും
കുറിച്ച് സംസാരിക്കാത്തത്?

വരൂ, ഈ തെരുവുകളിലെ രക്തം കാണൂ,
വരൂ,കാണൂ,
ഈ തെരുവുകളിലെ രക്തം,
വരൂ, രക്തം കാണൂ,
ഈ തെരുവുകളിലെ രക്തം.
Pablo Neruda.jpg
പാബ്ലൊ നെരൂദയെക്കുറിച്ച്

സാഹിത്യത്തിനുള്ള നോബല്‍ സമ്മാനം (1971) നേടിയ മഹാകവി.  പാബ്ലൊ നെരൂദ എന്നത് അദ്ദേഹത്തിന്റെ തൂലികാനാമമാണ്. റിക്കാര്‍ഡോ എലിയേസര്‍ നെഫ്തല റെയെസ്‌വൈ ബസുവോര്‍തോ എന്നാണ് മുഴുവന്‍ പേര്. നെരൂദയുടെ പ്രഥമ കവിതാസമാഹാരമായ ലാ ഷാന്‍സിയോണ്‍ ദ ലാ ഫിയെസ്റ്റ (ഉത്സവഗാനങ്ങള്‍) 1921-ല്‍ പ്രസിദ്ധീകരിച്ചു. ക്രിപുസ്കലാറിയോ (സന്ധ്യാപ്രകാശം 1923), വെയിന്റ് പൊയെമാസ് ദ അമോര്‍ ഇ യൂണ ഷാന്‍സിയോണ്‍ ഡെസ്പറേഡ് (ഇരുപതു പ്രണയകവിതകളും ഒരു നിരാശാഗീതവും-1924), റെസിഡെന്‍സിയ എന്‍ ലാടിയെറ (ഭൂമിയിലെ നിവാസം-1933) എന്നിവയും ആദ്യകാലത്തെ സമാഹാരങ്ങളാണ്. കാമം, ഏകാന്തത, മരണം എന്നിവ വേട്ടയാടുന്ന സര്‍റിയലിസ്റ്റ് കവിതകളാണ് ഇവയില്‍ ഭൂരിഭാഗവും. എന്നാല്‍ സ്പാനിഷ് ആഭ്യന്തരയുദ്ധവും ചിലിയിലെ മനുഷ്യാവസ്ഥയും അദ്ദേഹത്തെ ക്രമേണ കമ്മ്യൂണിസത്തിലേക്കെത്തിച്ചു. 1944-ല്‍ ഖനിത്തൊഴിലാളികളുടെ അഭ്യര്‍ഥനയനുസരിച്ച് സെനറ്ററായി മത്സരിച്ചു ജയിച്ചു. പിന്നീട് അഞ്ചുവര്‍ഷക്കാലം നെരൂദയ്ക്ക് ചിലിയില്‍ നിന്ന് ഒളിച്ചോടി വിദേശത്തു കഴിയേിവന്നു. അക്കാലത്ത് പതിനഞ്ചു കാണ്ഡങ്ങളിലായി എഴുതിയ കാന്റൊ ജനറല്‍ (1950) `ലാറ്റിന്‍ അമേരിക്കയുടെ ഇതിഹാസം' എന്ന പ്രസിദ്ധിനേടി. ഇതോടെ നെരൂദ അവിശുദ്ധകവിതയുടെ വക്താവായി. ഒഡാസ് എലിമെന്റാലിസ് (പ്രാരംഭഗീതകങ്ങള്‍-1954), എസ്ട്രാവഗാറിയൊ (1958), സീയെന്‍ സോണൈറ്റ് ദ അമോര്‍ (നൂറുപ്രണയഗീതങ്ങള്‍-1959), പ്ലിനോസ് പോദ്‌റെസ് (1966) തുടങ്ങിയവയാണ് മറ്റു മുഖ്യസമാഹാരങ്ങള്‍. ലോകത്തിന്റെ പല ഭാഗത്തും നെരൂദ ചിലിയുടെ നയതന്ത്രപ്രതിനിധിയായി സേവനമനുഷ്ഠിച്ചിട്ടുണ്ട്. അല്ലന്‍ഡെ ഭരണകൂടത്തെ അട്ടിമറിച്ച പട്ടാളവിപ്ലവത്തില്‍ വധിക്കപ്പെട്ടു.

Friday, June 25, 2010

മറഡോണ!മറഡോണ!!!

              ചരിത്രത്തിലെ ഏറ്റവും മികച്ച 2 ഗോളുകള്‍(2)                                    1986 ലെ മെക്സിക്കോ ലോകകപ്പിൽ അർജന്റീന-ഇംഗ്ലണ്ട് ക്വാർട്ടർ ഫൈനലിൽ അൻപത്തിനാലാം മിനുട്ടിൽ മറഡോണ നേടിയ ഗോൾ ലോകകപ്പ് ചരിത്രത്തിൽ സുവർണ ലിപികളിൽ കുറിച്ച രണ്ടാമത്തെ ഗോൾ.അൻപതാം മിനുട്ടിൽ ‘ദൈവത്തിന്റെ കൈ’ കൊണ്ട് താൻ നേടിയ വിവാദ ഗോളിൻ പ്രായശ്ചിത്തം ചെയ്യാനും മറഡോണക്ക് കഴിഞ്ഞു. മധ്യവ്യത്തത്തിൽ വച്ച് പന്ത് സ്വീകരിച്ച് ഒന്നിനു പിറകെ ഒന്നായി 4 പ്രതിരോധക്കാരെ ഡ്രിബിൾ ചെയ്ത് ഒടുവിൽ ഇംഗ്ലണ്ട് ഗോളി പീറ്റർ റീഡിനെ കടന്ന് കയറി മൈതാനത്തിന്റെ ഇടത്തെ ഓരത്തുകൂടി ശരവേഗത്തിൽ കുതിച്ച മറഡോണ ബോക്സിന് പുറത്തുവെച്ച് ടെറി ബുച്ചറെയും ഷെൻവിക്കിനെയും മറികടന്നു.കുതിച്ചെത്തുന്ന മറഡോണയെ നേരിടാൻ ഷിൽറ്റൻ മുന്നോട്ടെത്തുന്നതിനു മുൻപ് വീണ്ടും ബുച്ചർ ഓടിയെത്തിയപ്പോൾ മറഡോണ നാലാമതും ഡ്രിബിൾ ചെയ്തു മുന്നെറി.ഷിൽറ്റനെ മറ്റൊരു മിന്നൽ ഡ്രിബിളിൽ മറികടന്നപ്പോൾ ഗോൽ വലയത്തിലെ വിശാലമായ ശാദ്വലഭൂമി മാടിവിളിച്ചു....ഗോൾ!!! ഈ ഗോൽ നിത്യ സ്മാരകമാക്കുന്ന സ്മർണികാ ഫലകം പിറ്റേന്ന് മെക്സികോയിലെ അസ്ടെക് സ്റ്റേഡിയത്തിൽ സ്ഥാപിച്ചു.
Diego Maradona.jpg




                                    
                          മറഡോണ വിക്കി പേജ്                                                                                                                     ഡൌൺലോഡ് ചെയ്യുക

Thursday, June 24, 2010

ചരിത്രത്തിലെ ഏറ്റവും മികച്ച 2 ഗോളുകൾ(1)


                                        
                                                        Pelé Africa do Sul Cropped.jpg




          ലോകഫുട്ബോൾ ചരിത്രത്തിലെ ഏറ്റവും സുന്ദരങ്ങളായ രണ്ട് ഗോളുകളും ലാറ്റിൻ അമേരിക്കൻ ഇന്ദ്രജാലത്തിൽ നിന്നുണ്ടായതാണ്.
       ആദ്യത്തെ ഗോൾ പെലെയുടെ വകയായിരുന്നു:ബ്രസീൽ ആദ്യമായി കപ് നേടിയ 1958 ലെ ഫൈനൽ മത്സരത്തിൽ ആതിഥേയരായ സ്വീഡനെതിരെ.സ്വീഡൻ കളിയുടെ അഞ്ചാം മിനുറ്റിൽ തന്നെ ബ്രസീലിനെതിരെ ഗോളടിച്ചു.ബ്രസീൽ സടകുടഞ്ഞെണീക്കാൻ താമസിച്ചില്ല.ഗരിഞ്ചയുടെ ക്രോസിൽ വാവയുടെ 2 ഗോളുകൾ.ഒന്നാം പകുതി തീരുമ്പോൾ ബ്രസീൽ 2-1 ന് മുൻപിൽ.
       രണ്ടാം പകുതിയുടെ പത്താം മിനുട്ടിൽ പെലെയുടെ വിസ്മയ ഗോൾ പിറന്നു.
മരിയ സഗോലയുടെ സുന്ദരൻ പാസ് മുന്നേറ്റത്തിനിടയിൽ തിരിഞ്ഞുനിന്ന പെലെ,സ്വന്തം പോസ്റ്റിന് അഭിമുഖമായി പന്ത് കാൽമുട്ടു കൊണ്ട് തന്റെയും സ്വീഡന്റെ കളിക്കാരന്റെയും തലക്കു മുകളിലൂടെ മറിച്ചു.ഞൊടിയിടയിൽ തിരിഞ്ഞ് താഴോട്ട് വീഴുന്ന പന്ത് നിലം തൊടും മുമ്പ് ഉഗ്രൻ ഷോട്ട്.പ്രതിരോധ നിരയേയും ഗോളിയേയും ഒരുമിച്ച് തോൽ‌പ്പിച്ച മായികക്കാഴ്ച.അതായിരുന്നു പെലെയുടെ ആ ഗോൾ.
ചരിത്രത്തിലെ ഏറ്റവും മികച്ച 2 ഗോളുകൾ(1)

          ലോകഫുട്ബോൾ ചരിത്രത്തിലെ ഏറ്റവും സുന്ദരങ്ങളായ രണ്ട് ഗോളുകളും ലാറ്റിൻ അമേരിക്കൻ ഇന്ദ്രജാലത്തിൽ നിന്നുണ്ടായതാണ്.
       ആദ്യത്തെ ഗോൾ പെലെയുടെ വകയായിരുന്നു:ബ്രസീൽ ആദ്യമായി കപ് നേടിയ 1958 ലെ ഫൈനൽ മത്സരത്തിൽ ആതിഥേയരായ സ്വീഡനെതിരെ.സ്വീഡൻ കളിയുടെ അഞ്ചാം മിനുറ്റിൽ തന്നെ ബ്രസീലിനെതിരെ ഗോളടിച്ചു.ബ്രസീൽ സടകുടഞ്ഞെണീക്കാൻ താമസിച്ചില്ല.ഗരിഞ്ചയുടെ ക്രോസിൽ വാവയുടെ 2 ഗോളുകൾ.ഒന്നാം പകുതി തീരുമ്പോൾ ബ്രസീൽ 2-1 ന് മുൻപിൽ.
       രണ്ടാം പകുതിയുടെ പത്താം മിനുട്ടിൽ പെലെയുടെ വിസ്മയ ഗോൾ പിറന്നു.
മരിയ സഗോലയുടെ സുന്ദരൻ പാസ് മുന്നേറ്റത്തിനിടയിൽ തിരിഞ്ഞുനിന്ന പെലെ,സ്വന്തം പോസ്റ്റിന് അഭിമുഖമായി പന്ത് കാൽമുട്ടു കൊണ്ട് തന്റെയും സ്വീഡന്റെ കളിക്കാരന്റെയും തലക്കു മുകളിലൂടെ മറിച്ചു.ഞൊടിയിടയിൽ തിരിഞ്ഞ് താഴോട്ട് വീഴുന്ന പന്ത് നിലം തൊടും മുമ്പ് ഉഗ്രൻ ഷോട്ട്.പ്രതിരോധ നിരയേയും ഗോളിയേയും ഒരുമിച്ച് തോൽ‌പ്പിച്ച മായികക്കാഴ്ച.അതായിരുന്നു പെലെയുടെ ആ ഗോൾ.



Wednesday, June 23, 2010

കടൽത്തീരത്ത്

ഒ.വി.വിജയന്റെ കഥകളിൽ എനിക്കേറ്റവും പ്രിയപ്പെട്ടത് കടൽത്തീരത്ത് ആണ്.അതിൽ നിന്നൊരിഷ്ടഭാഗം:
 “അപരിചിതനെപ്പോലെ കണ്ടുണ്ണി വെള്ളായിയപ്പനെ നോക്കി.സാന്ത്വനം കൊടുക്കുകയോ വാങ്ങുകയോ ചെയ്യാനാവാത്ത മനസിന്റെ മറ.പാറാവുകാരൻ അഴിവാതിൽ തുറന്ന് വെള്ളായിയപ്പനെ അകത്തു പ്രവേശിപ്പിച്ചു.അച്ഛനും മകനും നേരോടു നേരായി തെല്ലിടനേരം നിന്നു.പിന്നെ വെള്ളായിയപ്പൻ മകനെ കെട്ടിപ്പിടിച്ചു.കണ്ടുണ്ണി ശ്രവണത്തിനപ്പുറമുള്ള ഒരു സ്ഥായിയിൽ നിലവിളിച്ചു.വെള്ളായിയപ്പൻ കരഞ്ഞു വിളിച്ചു:മകനേ!                                     കണ്ടുണ്ണി മറുവിളി വിളിച്ചു:അപ്പാ!  രണ്ടു വാക്കുകൾ മാത്രം.രണ്ട് വാക്കുകൾക്കിടയിൽ ദു:ഖത്തിൽ,മൌനത്തിൽ,അച്ഛനും മകനും അറിവുകൾ കൈമാറി.”
ഒ.വി.വിജയൻ വിക്കി പേജ്

മലയാളം വിക്കി സി.ഡി

Creating Wikipedia CD

Malayalam Wikimedians have released the CD version of the 500 selected articles of Malayalam Wikipedia on2010 April 17 as part of the 3rd Malayalam Wikimedian’s meetup.
Malayalam Wikipedia Version 1.0 CD  is available for download from the Malayalam Wikimedian’s community website sitehttp://mlwiki.in/. Following versions of Malayalam Wikipedia CD are available in the mlwiki.in web site
  • ISO image of the Malayalam Wikipedia CD version 1.0.
  • Online version of the Malayalam Wikipedia CD version 1.0.
Malayalalm Wikipedia CD sticker
Sticker used for the Malayalam Wikipedia CD Version 1.0. Designed by Hiran Venugopal (http://hiran.in/)

മലയാളം വിക്കിപീഡിയയെക്കുറിച്ചറിയൂ
ഡൌൺലോഡ്

Tuesday, June 22, 2010

മൊബൈൽ മരണം

വയനാട് ജില്ലയിലെ എഴുതിത്തെളിഞ്ഞു വരുന്ന പുതിയ കഥാക്യത്തുക്കളിലൊരാളുടെ ചെറുകഥയാണിത്.ദയവായി അഭിപ്രായങ്ങൾ അറിയിക്കുക.

                                            മൊബൈൽ മരണം
                                     ജോസ് പാഴൂക്കാരൻ,പുല്പള്ളി

              അവർ ഒരു മരത്തിന്റെ ചുവട്ടിൽ പരസ്പരം കണ്ടുമുട്ടി.നല്ല പടർപ്പൻ കമ്പുകളുള്ള ആ മരം നിലാവിൽ അവർക്കു മുകളിൽ കുട വിരിച്ചു നിന്നു.
             മുകളിലേക്കു നോക്കി ഇരുവരും ത്യപ്തിപ്പെട്ടു.
             അവർ മരത്തിന്റെ പൊന്തിയ വേരിൽ ഇരുന്നപ്പോൾ,ആ മടിയിലേക്ക് തല ചേർത്ത് വച്ച് അവൾ പൊട്ടിപ്പൊട്ടിക്കരഞ്ഞു.ഉടുമുണ്ടിൽ  കണ്ണീരൊപ്പി അവൻ പറഞ്ഞു.
              മരിക്കണമെന്നുള്ള നിന്റെ അവസാനത്തെ മെസേജ് എനിക്കു കിട്ടി.
ഒപ്പം നീയുമുണ്ടെന്ന് എനിക്കും,അവൾ പറഞ്ഞു.
              നിനക്കു വല്ലാതെ വേദനിച്ചു....എനിക്കും...
              അവർ മൊബൈലുകളെടുത്ത് ഇതു വരെ അയച്ച് രസിച്ച മെസേജുകളെല്ലാം ഒരിക്കൽ കൂടി വായിച്ചു.
            എന്താ പേര്?
            സൌമ്യ.....
           എവിടെ പoക്കുന്നു?
           എട്ട് ബി യിൽ
           എനിക്കിഷ്ടമായി!
           നിന്നെയും......!
           നാളെ കാണുമോ?
           ഫാത്തിമ ബസ്,മോർണിംഗ് 9.30...
            .................
            അവർ മൊബൈലുകൾ തമ്മിൽ ചേർത്തു പിടിച്ച് വിമ്മിക്കരഞ്ഞു.
ആദ്യമായി ഞാൻ നിന്നെ ചുംബിക്കുമ്പോൾ നീ ഭയന്നു ചുവന്നിരുന്നു.പിന്നെ ലജ്ജ കൊണ്ട് തുടുത്തു.പിന്നെ പൊട്ടിച്ചിരിച്ചു.ഇപ്പോൾ പൊട്ടിക്കരയുന്നു.
നമ്മുടെ ചുംബനങ്ങൾ ആരാണ് മൊബൈലിൽ പകർത്തിയത്?
            അറിയില്ല.
            എങ്ങനെയാണ് നെറ്റിൽ പടർന്നത്?
            അറിയില്ല.
            നീ എന്നെ ചതിക്കുകയായിരുന്നു?
           ഞാനല്ല.....ഈ മൊബൈലാണ് ചതിയൻ....
           അവൻ ദ്യശ്യങ്ങൾ തെളിച്ചു കാണിച്ചു.
ഇരുവരും പുണരുന്നതിന്റെ രാസക്കൂട്ട് കണ്ട് അവൾ കണ്ണുപൊത്തി.
          നിനക്കിതാരാണ് തന്നത്?
         എന്റച്ഛൻ.
         നിനക്കോ?
         എന്റമ്മ.അപകടത്തിൽ പെട്ടാൽ വിളിക്കാനാണ്.പുറത്തുപോയാൽ അമ്മയുടെ ടെൻഷൻ നിനക്കറിയില്ല.
          നമുക്കിത് അടിച്ചു തകർക്കാം....?
           അരുത്!നമുക്കിത് വേരുകൾക്കിടയിൽ പരസ്പരം ചേർത്ത് വെക്കാം.മരണശേഷം ആളുകൾ നമ്മുടെ പ്രണയത്തിന്റെ ആഴം അറിയട്ടെ.....
           അവൻ അപ്രകാരം ചെയ്ത ശേഷം ഉടുത്തിരുന്ന മുണ്ട് വലിച്ചു കീറി രണ്ടായി പിണച്ചു.
           നമുക്ക് മരിക്കണ്ടേ......?
           വേണം.
           അവൻ പടർപ്പൻ കൊമ്പിൽ മുണ്ടുകൊണ്ട് രണ്ട് വട്ടമുണ്ടാക്കി.
അവർ അവസാനമായി വീണ്ടും പുണർന്നു.
           പൊടുന്നനെ,താഴെ ഒട്ടിച്ചേർന്നിരുന്ന മൊബൈലുകളിൽ ഒരേ സമയം രണ്ട് മെസേജുകൾ ശബ്ദമിളക്കി.
           മരിക്കുന്നതിനു മുൻപുള്ള മെസ്സേജുകളിൽ അവരുടെ ആകാംക്ഷ മുറുകി.
മൊബൈലുകൾ മിഴി തുറന്നു.ചിരിച്ചു.
            കോൾ വിളിക്കാനുള്ള നിങ്ങളുടെ കാലാവധി അവസാനിച്ചിരിക്കുന്നു.വീണ്ടും റീ‍ചാർജ്ജ് ചെയ്യൂ! നേടൂ ഒരടിപൊളി ഓഫർ!
അവർ പരസ്പരം നോക്കി .പിന്നെ,മൊബൈലുകൾ മുകളിലെ കുരുക്കിൽ ഞാത്തിമുറുക്കി.
            എന്നിട്ട്,മുഖം തിരിഞ്ഞ് നടന്നു.....
                                              *************
ജോസ് പാഴൂക്കാരൻ എഴുതിയ  ’അരിവാൾ ജീവിതം’  എന്ന നോവലിന്റെ ഒരാസ്വാദനം ‘മാത്യഭൂമി’ ദിനപത്രത്തിൽ വന്നത് ചേർക്കുന്നു:

ജഗന്തിയെന്ന പെണ്ണ്‌
Posted on: 21 Jun 2010


ഡോ. ഖദീജ മുംതാസ്‌(പ്രൊഫസര്‍,മെഡിക്കല്‍ കോളേജ്,കോഴിക്കോട്)



സ്ത്രീപഥം


സിരകള്‍ക്കുള്ളില്‍ നൊമ്പരം അരിവാള്‍ പോലെ വളഞ്ഞുകുത്തിനില്ക്കുന്ന അനുഭവമായിരുന്നു ജോസ് പാഴൂക്കാരന്റെ 'അരിവാള്‍ ജീവിത'മെന്ന നോവലും നായിക ജഗന്തിയും പകര്‍ന്നുതന്നത്. അട്ടയെക്കൊണ്ടു ചോരയൂറ്റിച്ചും, ലോഹം പഴുപ്പിച്ചു ചൂടുവെച്ചും നിസ്സഹായരായി നിലത്തു വീണുരുണ്ടും ഗോത്രവംശജര്‍ സ്വന്തം ശരീരങ്ങളില്‍ നിന്ന് പിഴുതു മാറ്റാന്‍ പെടാപ്പാടുപെടുന്ന നൊമ്പരത്തെപ്പറ്റി, ഹൈഡ്രോക്‌സിയൂറിയയിലും ഫിനോബാര്‍ബിറ്റോണ്‍ ഗുളികകളിലും അടങ്ങുവാന്‍ മടിക്കുന്ന വേദനകളെപ്പറ്റി ഈനാള്‍ വരെ കാര്യമായൊന്നും ഞാനറിഞ്ഞിരുന്നില്ല, എത്രയോ അരിവാള്‍ രോഗികള്‍ (Sickle Cell Anaemia)എന്റെയും ചികിത്സാപരിസരങ്ങളിലൂടെ നിശ്ശബ്ദം കടന്നു പോയിട്ടും!

ആഫ്രിക്കയിലായാലും കേരളത്തിലായാലും കാടിന്റെ മക്കളായ ഗോത്രവംശജര്‍ തന്നെയാണ് സിക്കിള്‍ സെല്‍ അനീമിയയുടെ എപ്പോഴത്തേയും ഇരകള്‍. നിഷ്‌കളങ്കരും ശാന്തപ്രകൃതികളുമായ മനുഷ്യര്‍ അതിജീവനക്ഷമരല്ലെന്ന് തോന്നിപ്പിക്കുംവിധം അവരുടെ ജനിതകനാരുകളില്‍ പ്രകൃതി മരണ വാറന്റുപോലെ പതിപ്പിച്ചുവിടുകയാണ്, രക്തകോശങ്ങളെ വികലവും നാശോന്മുഖവുമാക്കുന്ന സിക്കിള്‍സെല്‍ ജീനുകള്‍. പൂര്‍വികരുടെ രക്താണുക്കളെ ദീര്‍ഘകാലം ആക്രമിക്കുകയും തളര്‍ത്തുകയും ചെയ്തിരുന്ന മലേറിയാ അണുക്കളെ പ്രതിരോധിക്കാനായി രൂപാന്തരം പ്രാപിച്ചവയായിരിക്കാം ഒരു പക്ഷേ ഈ ജീനുകള്‍.

എന്നിട്ടോ? എയ്ഡ്‌സിനോളം മാരകമായവിധത്തില്‍ പിന്‍ഗാമികളുടെ ആരോഗ്യത്തിനും രോഗ പ്രതിരോധത്തിനും പ്രഹരമേല്‍പ്പിച്ചു വിജയാഹ്ലാദം കൊള്ളുകയാണ് ഇന്നവ. ആദിവാസി സമൂഹത്തിന്റെ ഇരുപതു മുതല്‍ മുപ്പതു ശതമാനം വരെ അംഗങ്ങള്‍ ഈ രോഗത്തിന്റെ പിടിയിലമര്‍ന്നിട്ടും അധികാരവര്‍ഗം ഈ നിസ്സഹായര്‍ക്കു നേരെ ക്രൂരമായ നിസ്സംഗത കാട്ടുന്നുണ്ടോ?

ആദിവാസി ക്ഷേമമെന്ന പേരില്‍ അളവില്ലാത്ത പണം ഏതൊക്കെയോ ചാലുകളിലൂടെ ഒഴുകിക്കൊണ്ടിരിക്കുമ്പോഴും ഗോത്രസമൂഹങ്ങളെത്തന്നെ തുടച്ചുനീക്കുമാറ് കരാളരൂപംപൂണ്ട രോഗത്തിനെതിരെ ''നിങ്ങള്‍ സമരം ചെയ്യൂ. ഗവണ്‍മെന്റ് ഫണ്ടനുവദിച്ചാല്‍ എല്ലാ പ്രശ്‌നവും തീരും'' എന്നു നിസ്സംഗരാവാന്‍ ഡോക്ടര്‍ സമൂഹം തുനിയുന്നത് നോവലില്‍ മാത്രമാണോ?

നവീകരിച്ച സര്‍ജിക്കല്‍ വാര്‍ഡുകളും ആദിവാസി ക്ഷേമത്തിന് ഫീല്‍ഡുചുറ്റാനുള്ള ടാറ്റാ സുമോ വാനുകളും സര്‍ക്കാറാസ്​പത്രികളിലെത്തുന്ന കാടിന്റെ മക്കളെ നോക്കി പരിഹാസച്ചിരിയുയര്‍ത്തുകയാണ്. ആദിവാസിക്ക് പഠിപ്പില്ല, ലോകവിവരമില്ല, വികാരങ്ങളില്ല, വേദനകളില്ല, സാമൂഹികബോധവുമില്ല! അതുകൊണ്ടുതന്നെ, സ്വന്തം മക്കള്‍ രോഗം ബാധിച്ച് തീവ്രവേദനയില്‍ അലറിക്കരയുമ്പോള്‍ ''എനക്കു ബയ്യ; മരിച്ചാല് മരിക്കട്ടെ!'' എന്നു നിസ്സംഗരാവാന്‍ ഇനിയൊന്നും വിറ്റുതുലയ്ക്കാനില്ലാത്ത ആദിവാസി മാതാപിതാക്കള്‍ നിര്‍വികാരരാകുന്നു.

രോഗത്തിന് ആണ്‍പെണ്‍ ഭേദമില്ലെങ്കിലും വികല ജീനിന്റെ വാഹകരെന്ന പേരില്‍ ചെട്ടിസമുദായത്തിലെ പുരുഷര്‍, സ്വസമുദായത്തിലെ സ്ത്രീകളെ തള്ളിപ്പറഞ്ഞ് നമ്പ്യാര്‍ പെണ്‍കുട്ടികളെയും നായര്‍പെണ്‍കുട്ടികളെയും തേടിപ്പോകുന്നു. ജന്മം മുഴുവന്‍ അവിവാഹിതരായി കഴിയേണ്ടിവരുമെന്നു പേടിച്ച് കന്യകമാര്‍ ആത്മഹത്യ ചെയ്യുന്നു. രോഗം ബാധിച്ചവര്‍ അപകര്‍ഷതയോടെ അതു മറച്ചുവെച്ച് കുടിലിലെ ഇരുളില്‍ വിളര്‍ത്തുവിരണ്ട് അകാലവാര്‍ധക്യം വരിക്കുന്നു.

എം.ടി.യേയും മാധവിക്കുട്ടിയേയും വായിക്കുന്ന, ശ്രുതിമധുരമായി പാടാനറിയുന്ന അമ്മാളുവിനെപ്പോലെയുള്ള കുരുന്നുപ്രതിഭകള്‍ രോഗത്താല്‍ വാടി, അകാലത്തില്‍ മുരടിച്ചു പോകുന്നു..... രോഗമായാലും ദാരിദ്ര്യമായാലും ഏറ്റവുമധികം പീഡകളനുഭവിക്കേണ്ടിവരുന്നത് എപ്പോഴും സ്ത്രീ തന്നെ!

ഏത് ഇരുളിലും ഒരു ആശാകിരണം ജ്വലിക്കാതിരിക്കുമോ? ജഗന്തിയെന്ന ചെട്ടിച്ചിപ്പെണ്ണിലൂടെയാണ് നോവലില്‍ വയനാട്ടിലെ അരിവാള്‍ രോഗികള്‍ ഉയിര്‍ത്തെഴുന്നേല്പിന്റെ തപ്പും തുടിയും കേട്ടുതുടങ്ങുന്നത്. കുടകിന്റെ സൗന്ദര്യവും സ്വാതന്ത്ര്യബോധത്തിലൂന്നിയ വിദ്യാഭ്യാസവും കൈമുതലായുണ്ടായിരുന്ന ജഗന്തിക്ക് വ്യക്തിപര നഷ്ടങ്ങളും അസ്വാതന്ത്ര്യവുമായി അരിവാള്‍ രോഗം ബാധിക്കുകയാണ്. നൂറ്റാണ്ടുകള്‍ക്കു മുമ്പ് വയനാടന്‍ മണ്ണില്‍ സ്വത്വവേരുകളാഴ്ത്തിയ സ്വന്തം ചെട്ടി സമുദായാംഗങ്ങളില്‍ മാത്രമല്ല, തങ്ങളോടിണങ്ങിക്കഴിയുന്ന പ്രാക്തന ഗോത്രസമുദായാംഗങ്ങളായ പണിയ, അടിയ വംശജരിലും അരിവാള്‍ രോഗം ഏല്പിക്കുന്ന ആഘാതത്തിന്റെ ഭീകരത എത്രമാത്രമാണെന്ന് ജഗന്തി അറിഞ്ഞുതുടങ്ങുന്നത് രോഗബാധിതയായതിനുശേഷം മാത്രം. നിശ്ചയിക്കപ്പെട്ട വിവാഹം മുടങ്ങി മാനസികമായി ഒറ്റപ്പെട്ടപ്പോള്‍, തന്നെപ്പോലെ വേദനയനുഭവിക്കുന്ന മറ്റുള്ളവര്‍ക്ക് എന്തെങ്കിലുമൊക്കെ ചെയ്യണം എന്ന ദൃഢനിശ്ചയമെടുക്കുകയാണ് അവള്‍. ഒറ്റയാള്‍ പട്ടാളമായി അവള്‍ ഇറങ്ങിപ്പുറപ്പെട്ടു,

ഏറ്റവും അടുത്ത അരിവാള്‍ ബാധിത കുടുംബത്തിലേക്കുതന്നെ. പതുക്കെപ്പതുക്കെ അവള്‍ക്കു കൂട്ടാവുകയാണ്, അവള്‍ തന്നെ ഊതിപ്പെരുക്കിയെടുത്ത ആത്മവിശ്വാസവുമായി അവളെപ്പോലെ അവശരായവര്‍.അവരില്‍ പുരുഷന്മാരും കുട്ടികളും സ്ത്രീകളുമുണ്ട്. അരിവാള്‍ രോഗികളായ തങ്ങളുടെ അതിദീനമായ അവസ്ഥയ്ക്ക് കാരണം വെറും രോഗം മാത്രമല്ല, സമുദായാംഗങ്ങളുടെ നിഷ്‌കളങ്കതയും അന്ധവിശ്വാസങ്ങളും വിദ്യാഭ്യാസമില്ലായ്മയും സാമൂഹികബോധമില്ലായ്മയും ഒക്കെ കൂടിയാണെന്ന് അവര്‍ തിരിച്ചറിയുകയാണ്. തക്കാളിക്കവിളുകളില്‍ പതുക്കെപ്പതുക്കെ അരിച്ചുകയറുന്ന വിളര്‍പ്പും ഏറെ നടന്നാല്‍ നീരുവന്നുവീര്‍ക്കുന്ന കാലുകളും തളര്‍ത്തുന്ന ശാരീരിക വേദനകളുമായി ജഗന്തി ധീരയായി കുന്നും മലയും കാടും പാടവും പുഴയും താണ്ടി അരിവാള്‍ രോഗികളെ സംഘടിപ്പിക്കുകയാണ്, അവരുടെ ആരോഗ്യസംരക്ഷണ കാര്യങ്ങളില്‍ ഇടപെടുകയാണ്, ബോധനക്ലാസുകള്‍ സംഘടിപ്പിക്കുകയാണ്, ആരോഗ്യ പ്രവര്‍ത്തകരെ ഉണര്‍ത്തുകയാണ്, ഗവണ്‍മെന്റിന്റെ കണ്ണു തുറപ്പിക്കാനുള്ള നിവേദനങ്ങള്‍ അയപ്പിക്കാന്‍ പ്രാപ്തയാവുകയാണ്! ഇവയ്ക്കിടയില്‍ അവളെ തോല്പിക്കാനൊരുങ്ങുന്നത് രോഗപീഡകള്‍ മാത്രമല്ല, അപവാദ പ്രചാരണങ്ങളും ഭീഷണികളും സ്വകുടുംബാംഗങ്ങളില്‍ നിന്നുതന്നെയുള്ള അവഗണനയും പുച്ഛവും ഒക്കെയാണ്. പൊതു സേവന രംഗത്തേക്കിറങ്ങുന്ന സ്ത്രീക്ക് കൂച്ചുവിലങ്ങൊരുക്കുന്ന സമൂഹമനശ്ശാസ്ത്രം എപ്പോഴും എവിടെയും ഒരുപോലെത്തന്നെ.

''മറ്റുള്ളവര്‍ക്കു വേണ്ടി ദൗത്യങ്ങള്‍ ഏറ്റെടുക്കേണ്ട കരാറിലാണ് മനുഷ്യര്‍ ജനിക്കുന്നതു തന്നെ. ആ നിയമം തെറ്റിക്കുമ്പോഴാണ് പ്രകൃതി നമ്മെ അസന്തുലിത ഋതുക്കളിലൂടെ ശിക്ഷിക്കുന്നത്. രോഗമെന്നത് പ്രകൃതിയുടെ ഉപദേശം മാത്രമായിരിക്കാം.'' ജഗന്തിയുടെ ചിന്തകളായി നോവലിസ്റ്റ് രേഖപ്പെടുത്തിയ വാക്കുകളാണിവ. പഴശ്ശിപ്പടയോട്ടങ്ങളുടെയും നക്‌സല്‍ വര്‍ഗീസിന്റെയും അജിതയുടെയും ജ്വലിക്കുന്ന ആശയങ്ങളുടെയും ചരിത്രമുറങ്ങുന്ന വയനാട്ടിലെ തിരുനെല്ലിയില്‍ കുരുത്തവള്‍ തന്നെ ജഗന്തിയും. ചരിത്രം നീതിക്കുവേണ്ടി പോരാടിയവര്‍ക്കെല്ലാം തൂക്കുമരണവും അധിക്ഷേപവും കൊടുത്തിട്ടുണ്ട് എന്നവള്‍ക്കറിയാം. അതാണ് ജഗന്തിയെ സേവനരംഗത്തും ചൂഷകര്‍ക്കെതിരായ സമരരംഗത്തും അവസാന ശ്വാസം വരെ പിടിച്ചുനിര്‍ത്തുന്നത്. രോഗവും അവശതയുമറിഞ്ഞിട്ടും അവളെ വേള്‍ക്കാനൊരുങ്ങുന്ന, ബാല്യകാല സഖാവായ ദേവേശന്റെ മടിയില്‍ക്കിടന്ന് അന്ത്യശ്വാസം വലിക്കുകയാണ് പോരാട്ടത്തിനിടെ ജഗന്തി. വിവാഹശേഷം അവളെ വിളിക്കാനായി കരുതിവെച്ച പൂപോലെയുള്ള വാക്കുകള്‍ ദേവേശന് അപ്പോഴേ ഉരുവിടാനാകുന്നുള്ളൂ. ''ജമന്തി..... ജമന്തി.''

കൊല്ലങ്ങളോളം ആദിവാസി ഊരുകളിലും ചെട്ടിമനകളിലും ഗ്രാമങ്ങളിലും അനുതാപപൂര്‍വമായ അന്വേഷണബുദ്ധിയോടെ അലഞ്ഞുനടന്നു തന്നെയാകണം എഴുത്തുകാരന് ആ സംസ്‌കാരങ്ങളേയും ഭാഷയേയും വിശ്വാസങ്ങളെയും ദൈന്യതകളേയും ഈവിധം തനിമയോടെ ഒപ്പിയെടുക്കാനായത്. ചരിത്രവും മിത്തുകളും ആത്മീയതയും കൈകോര്‍ക്കുന്ന വയനാടന്‍ ഭൂപ്രകൃതി ജീവനുള്ള കഥാപാത്രമായി നോവലില്‍ ഉടനീളമുണ്ട്. വ്യത്യസ്ത സംസ്‌കാരങ്ങളുള്ള ആദിവാസി സമൂഹങ്ങളും കര്‍ണാടകയിലും തമിഴ്‌നാട്ടിലും വേരുകളുള്ള വ്യത്യസ്ത ചെട്ടി സമുദായങ്ങളും അവരുടെ ഭാഷാന്തരങ്ങളും ഒക്കെ സൂക്ഷ്മദൃക്കായ ഒരു ആസ്വാദകനെ സംതൃപ്തനാക്കും വിധം തനിമയാര്‍ന്ന ഭാഷയോടെ ചിത്രീകരിക്കാനാവുന്നുണ്ട് എഴുത്തുകാരന്.

കുടിയേറ്റത്തിന്റെ സാഹസികതയെ, കഠിനതകളെ, പറിച്ചു നടപ്പെട്ടവന്റെ വേദനകളെപ്പറ്റി എഴുതാമായിരുന്നു കുടിയേറ്റകര്‍ഷക കുടുംബാംഗമായ ജോസ് പാഴൂക്കാരന്. കാട്ടാനകളോടും കാട്ടുപന്നികളോടും മലമ്പനിയോടും അടരാടി മലമുകളില്‍ കനകം വിളയിച്ചവന്റെ കഥകള്‍ എമ്പാടും പറയാനുണ്ടാകും അത്തരമൊരാള്‍ക്ക്.

തന്നെയോ, തന്റെ കുടുംബാംഗങ്ങളെയോ ബാധിക്കുന്നതിനപ്പുറമുള്ള രോഗങ്ങളെപ്പറ്റി ആകുലനാകാനും ആ രോഗാവസ്ഥ മനുഷ്യബന്ധങ്ങളിലും സമൂഹത്തിലുമുളവാക്കുന്ന പ്രതിസന്ധികള്‍ക്ക് സര്‍ഗാവിഷ്‌കാരം നല്‍കാനും കഴിയുക എന്നത് ചുരുങ്ങിയ കാര്യമല്ല. വയനാട്ടിലെ സാഹിത്യവാസനയുള്ള ഒരു ഡോക്ടര്‍, അല്ലെങ്കില്‍ മറ്റൊരാരോഗ്യ പ്രവര്‍ത്തകന്‍, എന്തുകൊണ്ടിതുവരെ 'അരിവാള്‍ ജീവിതം' എഴുതിയില്ല എന്ന അത്ഭുതമാണെനിക്ക്. തന്റെ പറമ്പില്‍ കൊത്തുകയും കിളയ്ക്കുകയും വയലില്‍ നിശ്ശബ്ദം പണിയെടുക്കുകയും കാട്ടുതേനും കാട്ടു വിഭവങ്ങളും നിസ്സാരവിലയ്ക്ക് നാട്ടുകാര്‍ക്ക് വിറ്റ് സന്ധ്യയായാല്‍ കള്ള് മോന്തി, ലക്കുകെട്ട് കാടിന്റെ അന്ധകാരങ്ങളിലേക്ക് പിന്‍വാങ്ങുകയും ചെയ്യുന്ന ആദിവാസിയുടെയും കമ്പോള വ്യവസ്ഥകളുടെ കാപട്യമറിയാത്ത ചെട്ടിയുടെയും ആരോഗ്യസമസ്യകളെ സര്‍ഗാത്മകമായി മറനീക്കിക്കാണിക്കാന്‍ ഒരു ജോസ് പാഴൂക്കാരന്‍ തന്നെ വേണ്ടി വന്നുവല്ലോ!

വ്യക്തിപരമായ ദുഃഖങ്ങളിലും സംഘര്‍ഷങ്ങളിലും കാലൂന്നിനിന്ന്, അവയുടെ സാമൂഹികപരമായ മാനത്തിലേക്ക് കണ്ണയയ്ക്കുകയും ധീരയാവുകയും ചെയ്യുന്ന സ്ത്രീ എരിയുന്ന കനല്‍ക്കട്ടയില്‍ നിന്ന് വജ്രമായി പരിണമിക്കുകയാണ്. ജഗന്തിയെന്ന അത്യുജ്ജ്വല നായികയെ കണ്ടെത്തിയ ജോസ് പാഴൂക്കാരന് നന്ദി!

ജോസ് പാഴൂക്കാരന്റെ ഫോൺ:9495532101 ഇ മെയിൽ:pazhukaran@gmail.കോം
പ്രസാധകര്‍ :കൈരളി ബുക്സ് , താളിക്കാവ് റോഡ്‌ , കണ്ണൂര്‍ ഫോണ്‍:04972761200
                    വില : 85 രൂപ .


Monday, June 21, 2010

ലാ സ്ട്രാഡ:അധ:സ്ഥിതരുടെ ശോകഗീതം


രാജപാതകളില്‍ അലയുന്നവര്‍
 ‘ലാ സ്ട്രാഡ‘ (1954)


ആധുനിക സിനിമയെക്കുറിച്ചുള്ള പരിചിന്തനം ഫെല്ലിനിയെക്കൂടാതെ ഒരിക്കലും പൂര്‍ണമാവുന്നില്ല.ആത്മ കഥാപരമായ ചലചിത്ര രചനയാ‍ണ് ഇതര ചലചിത്രകാരന്മാരില്‍ നിന്നും ഫെല്ലിനിയെ മാറ്റി നിര്‍ത്തുന്നത്.
1954 ല്‍ പുറത്തുവന്ന അദ്ദേഹത്തിന്റെ രണ്ടാമത്തെ സിനിമയായ  ‘ലാ സ്ട്രാഡ‘ ഒരു ക്ലാസിക്കിന്റെ ശക്തിസൌന്ദര്യങ്ങള്‍ സമാര്‍ജ്ജിച്ച രചനയാണ്.എക്കാലത്തെയും മികച്ച ചിത്രങ്ങളിലൊന്നായി ഈ സിനിമയെ പ്രേക്ഷകര്‍ വിലയിരുത്തുന്നു.1956-ലെ മികച്ച വിദേശ ചിത്രത്തിനുള്ള അക്കാദമി പുരസ്കാരം ഈ ചിത്രം നേടിയിട്ടുണ്ട്.
ജീവിതത്തിന്റെ പുറമ്പോക്കുകളിലേക്കു തള്ളപ്പെട്ട ഏതാനും നിസ്സാര മനുഷ്യരുടെ കഥയാണ്  ‘ലാ സ്ട്രാഡ‘ പറയുന്നത്. ‘ലാ സ്ട്രാഡ‘ എന്നാല്‍ പാതയെന്നാണര്‍ഥം.പാതയാകട്ടെ നിത്യമായ പ്രയാണത്തെ അര്‍ത്ഥമാക്കുന്നു.
തെരുവുകളിലെ ചെപ്പടി വിദ്യക്കാരനായ സമ്പാനോവും അവന്റെ സഹായിയായി എത്തിച്ചേര്‍ന്ന ഗെല്‍സോമിനയും തമ്മിലുള്ള ബന്ധമാണ് സിനിമയിലെ ഇതിവ്യത്തം.നിയോറിയലിസത്തിന്റെ അയത്നലാളിത്യം സിനിമയിലുടനീളം നിറഞ്ഞു നില്‍ക്കുന്നു. 
പാതയില്‍ നിന്ന് വേറിട്ടൊരസ്തിത്വം സമ്പാനോ എന്ന പരുക്കന്‍ മനുഷ്യനില്ല.ഏതോ കാലത്ത് തെരുവിലേക്ക് തള്ളിമാറ്റപ്പെട്ടയാളാണ് സമ്പാനോ.നാമയാളെ ആദ്യമായി കാണുന്നതും പാതയില്‍ വെച്ചുതന്നെ.ഗെല്‍സോമിനയുടെ വീട്ടിനടുക്കലെ പാതയില്‍ അയാളുടെ തെരുവു സര്‍ക്കസ് വാഹനം വന്ന് നിന്നു.അയാള്‍ സഹായിയായി കൂട്ടിക്കൊണ്ടു പോയിരുന്ന പെണ്‍കുട്ടി,ഗെല്‍സോമിനയുടെ സഹോദരി,മരിച്ചുപോയ വിവരം അറിയിക്കാനാണയാള്‍ എത്തിയത്.ആ ദുരന്തത്തില്‍ മനം നൊന്തു കരയുന്നതിനിടയിലും അമ്മയ്ക്കു വ്യഗ്രത ഗെല്‍സോമിനയെ സഹോദരിക്കു പകരമായി പറഞ്ഞയയ്ക്കാനാണ്.അറിഞ്ഞുകൊണ്ട് കുരുതിക്കു കൊടുക്കുകയാണെന്ന് അമ്മക്കറിയാതെയല്ല.പക്ഷെ അതു കൂടാതെ വയ്യ.വയര്‍ നിറയെ ആഹാരം അപ്രാപ്യമായ സ്വപ്നമായിരുന്ന അവര്‍ക്ക് അതേ കഴിയുമായിരുന്നുള്ളു.അങ്ങനെ കരച്ചിലിനിടയിലൂടെ ഗെല്‍സോമിന തെരുവിലേക്കു തള്ളിയിറക്കപ്പെട്ടു.അവള്‍ സമ്പാനോവിന്റെ സര്‍കസ് വണ്ടിക്കുള്ളില്‍ കയറി.ഒരടിമക്കച്ചവടം തന്നെയായിരുന്നു അത്.പരിശീലനത്തിനിടെ സമ്പാനൊ അവളെ അതിക്രൂരമായി പീഡിപ്പിക്കുന്നുണ്ട്.സര്‍ക്കസ് കൂടാരത്തിലെ മ്യഗത്തോടെന്നവണ്ണമല്ലാതെ ഒരു മനുഷ്യജീവിയോടെന്ന പോലെ അവളോട് അയാള്‍ പെരുമാറുന്നില്ല.അവളാകട്ടെ,മനുഷ്യസാധാരണമായൊരു ബന്ധം അയാളുമായി സ്ഥാപിക്കുവാന്‍ ഓരോ നിമിഷവും ശ്രമിക്കുന്നുണ്ട്.എന്നാല്‍ മ്യദുലവികാരങ്ങള്‍ ഒളിനോട്ടം പോലുമിടാത്ത സമ്പാനോവിന്റെ മനസ്സില്‍ അതു ഒരു ചലനവുമുണ്ടാക്കുന്നില്ല.അവരുടെ തെരുവുജീവിതത്തിലുണ്ടായ അപ്രതീക്ഷിത സംഭവങ്ങള്‍ അയാളെ ജയിലിലാക്കുന്നു;അവളെ ഭ്രാന്തിയുമാക്കുന്നു.വര്‍ഷങ്ങള്‍ക്കു ശേഷം ഒരു നാള്‍ സമ്പാനോ അവളുടെ മരണത്തെക്കുറിച്ചറിയുന്നു.അപ്പോള്‍ മാത്രമാണ് ഗെല്‍സോമിനയോട് താന്‍ എത്രമാത്രം ബന്ധപ്പെട്ടിരുന്നു എന്നയാള്‍ മനസ്സിലാക്കുന്നത്.കടല്‍തീരത്തു ചെന്നിരുന്നു കരയുന്ന സമ്പനോയില്‍ മനുഷ്യത്വം നിറഞ്ഞുവരുന്നു .
  പ്രശസ്തനായ ആന്റണി ക്വിന്നാണ് സമ്പാനോവിന്റെ വേഷത്തില്‍ വരുന്നത്.സമ്പാനോവിന്റെ മനുഷ്യത്വരഹിതമായ പരുക്കന്‍ സ്വഭാവത്തിന് ഇതിലേറെ മിഴിവു നല്‍കാന്‍ മറ്റാര്‍ക്കും കഴിയുമെന്നു തോന്നുന്നില്ല.ഫെല്ലിനിയുടെ നടിയായ ഭാര്യ ഗിലിറ്റാ മാസിനയാണ് ഗെല്‍സോമിനയുടെ റോളില്‍.തുറിച്ച കണ്ണുകളുള്ള ഈ അരക്കിറുക്കിയെ അവളുടെ നിഷ്കളങ്കത,പേടി,ബാലിശത്വം,വിഡ്ഡിത്തരം,ദീനത തുടങ്ങിയ ഒട്ടേറെ ഭാവങ്ങളോടെ അവതരിപ്പിച്ച് വിജയിപ്പിക്കാന്‍ സാമാന്യമായ പ്രതിഭ പോര.അത് എത്രയും ഭംഗിയായി നിര്‍വ്വഹിച്ച മാസിന ഒരു നടിയെന്ന നിലയ്ക്ക് പൂര്‍ണ്ണത നേടിയിരിക്കുന്നു.
അധ:സ്ഥിതരുടെ ശോകഗീതമാണു ‘ലാ സ്ട്രാഡ‘ .ഒപ്പം മനുഷ്യബന്ധങ്ങളെക്കുറിച്ച് ആഴത്തിലുള്ള ഉള്‍ക്കാഴ്ചയും.

     ഫെല്ലിനിയെക്കുറിച്ച്


ഇറ്റാലിയന്‍ ചലച്ചിത്ര സംവിധായകനും തിരക്കഥാകൃത്തും. ഇദ്ദേഹത്തിന്റെ സൃഷ്ടികള്‍ ആധുനിക സിനിമാപ്രസ്ഥാനത്തില്‍ കടുത്ത സ്വാധീനം ചെലുത്തി. സ്വപ്നവും ഭാവനയും കലര്‍ന്ന ആത്മകഥാംശം നിറഞ്ഞ ആക്ഷേപഹാസ്യപരമായ ചിത്രങ്ങളായിരുന്നു. വെറൈറ്റി ലൈറ്റ്‌സ് (1950) ആണ് ശ്രദ്ധേയമായ ആദ്യചിത്രം. ദ യങ് ആന്റ് ദ പാഷണേറ്റ്, ദ സ്ട്രീറ്റ് (ലാ സ്ട്രഡ), നൈറ്റ്‌സ് ഒഫ് കബീരിയ, ദ സ്വീറ്റ് ലൈഫ്, ജൂലിയറ്റ് ഒഫ് ദ സ്പിരിറ്റ്‌സ്, ഫെല്ലിനി സറ്റയറിക്കൊണ്‍, ദ ക്ലൗണ്‍സ്, റോമാ, കാസനോവ, ഓര്‍കെസ്ട്ര റിഹേഴ്‌സല്‍, സിറ്റി ഒഫ് വിമെന്‍ ആന്റ് ദ ഷിപ് സെയില്‍സ് ഓണ്‍, 8 1/2 എന്നിവ പ്രശസ്ത ചിത്രങ്ങളാണ്. ലാ സ്ട്രഡ എന്ന ചിത്രം 1954-ലും നൈറ്റ്‌സ് ഒഫ് കബീരിയ എന്ന ചിത്രം 1956-ലും അക്കാദമി അവാര്‍ഡ് നേടി. 1993-ല്‍ ചലച്ചിത്രരംഗത്തെ അദ്ദേഹത്തിന്റെ സംഭാവനയ്ക്ക് പ്രത്യേക അവാര്‍ഡ് ലഭിച്ചു. 

വിക്കി ലിങ്ക്: ലാ സ്ട്രാഡ
വിക്കി ലിങ്ക്:ഫെല്ലിനി
ടോറന്റ് ലിങ്ക്
പോസ്റ്ററുകള്‍
തിരക്കഥ

അമേരിക്കൻ യേശുദാസിനെ കേൾക്കൂ!



      ജിം റീവ്സ്





(1923– 1964 )









ഘനഗംഭീര ശബ്ദം കൊണ്ട് ആയിരങ്ങളെ കീഴടക്കിയ ജിം റീവ്സ്,country songs ന്റെ ആചാര്യനാണ്. 1964 ല്‍ അന്തരിച്ച അദ്ദേഹത്തിന് ഇന്നും ധാരാളം ആരാധകരുണ്ട്.നമ്മുടെ യേശുദാസിനെ ആദ്യകാലങ്ങളിൽ ‘കേരള ജിം റീവ്സ്’എന്ന് വിളിച്ചിരുന്നു. അദ്ദേഹത്തിന്റെ ഒരു പ്രശസ്ത ഗാനം കേള്‍ക്കൂ.
















Jim Reeves - -Jim Reeves Making Believe .mp3
                                 
Found at bee mp3 search engine









Making believe







That you still love me




It's leaving me
Alone and so blue.

I'll always dream,
Still I'll never own you
Making believe,
It's all I can do.

I can't hold you close
When you're not with me
You're somebody's love,
You'll never be mine.

Making believe
I'll spend my lifetime
Loving you,
Making believe.

--- Instrumental ---

Making believe
I've never lost you
But my happy hours
I find are so few.

My plans for the future
Will never come true dear
I'm making believe
What else can I do?.. 












                                                                  വിക്കി പേജ്
                                                                  ഡൌൺലോഡ്


Sunday, June 20, 2010

പാഠം മുപ്പത്‌ :അക്ബര്‍ കക്കട്ടില്‍

അക്ബര്‍ കക്കട്ടിലിന്റെ മുപ്പതു വര്‍ഷത്തെ അധ്യാപകജീവിതത്തിലൂടെയുള്ള സഞ്ചാരമാണ് പാഠം മുപ്പത്. മലയാളത്തില്‍ ഒരു അധ്യാപകന്‍ എഴുതുന്ന ആദ്യ സര്‍വീസ് സ്‌റ്റോറി.
പാഠം മുപ്പത്‌

അക്ബര്‍ കക്കട്ടില്‍

സ്മരണ

ഭാഷ : മലയാളം
 
page : 128

Edition : 0

Publisher : Mathrubhumi

Price : 75  രൂപ



ഖലീൽ ജിബ്രാന്റെ ‘ചെറു’കഥ

Khalil Gibran.jpg 

 നോക്കുകുത്തി
   ഖലീൽ ജിബ്രാൻ
          ഞാൻ ഒരു നോക്കുകുത്തിയോട് ഒരു ദിവസം ചോദിച്ചു:‘നിങ്ങൾ നശിച്ച ഈ വയലിൽ നിന്ന് ക്ഷീണിച്ചുകാ‍ണും അല്ലേ?’
           അതു പറഞ്ഞു:മ്യഗങ്ങളെ പേടിപ്പിച്ചോടിക്കുക രസമാണ്.പിന്നെ എനിക്കെന്തു ക്ഷീണം?’
            ഞാൻ ഒരു നിമിഷം ചിന്തിച്ചു:‘വാസ്തവമാണ്.ഞാനും ഇത്തരം ആനന്ദം അനുഭവിച്ചിട്ടുണ്ട്.’
            പുല്ലും വൈക്കോലും നിറച്ച ശരീരം ഉള്ളവർക്കേ അതിന്റെ വാസ്തവമറിയൂ’
 ഇതു കേട്ടുകൊണ്ട് ഞാനവിടെ നിന്നു പോയി.എന്നെ അത് കീർത്തിക്കുകയോ പുഛിക്കുകയോ ചെയ്തതെന്നെനിക്കറിയില്ല.
             ഒരു വർഷം കഴിഞ്ഞു.അതിനിടയ്ക്ക് അതൊരു തത്വജ്ഞാനിയായി പരിണമിച്ചിരുന്നു.ഞാനതിനെ അന്നു സമീപിച്ചപ്പോൾ അതിന്റെ തലയിൽ രണ്ട്    കാക്കകൾ കൂടുകൂട്ടിയിരുന്നു.                                                                         ഖലീൽ ജിബ്രാന്റെ വിക്കി പേജ്

Saturday, June 19, 2010

എനിക്കതറിയില്ലെന്നയാൾക്കറിയാമല്ലോ!

സൌഹ്യദം

ആർ .രാമചന്ദ്രൻ

സമയം 9.15
സ്ഥലം ബസ് സ്റ്റോപ്പ്
ഞങ്ങൾ
അവിടെ
ഒപ്പമെത്തുന്നു
ഞങ്ങൾ അന്യോന്യം നോക്കി
പുഞ്ചിരിക്കുന്നു.

അയാളാരാണ്?
അയാൾ എവിടെ നിന്നു വരുന്നു?
ഞാൻ ചോദിക്കാറില്ല
ചോദിച്ചിട്ടില്ല
എനിക്കതറിയില്ലെന്നയാൾക്കറിയാമല്ലോ!
അല്ലെങ്കിൽ
എനിക്കതറിയാമെന്നയാൾക്കറിയില്ലെന്ന്
എനിക്കറിയാമല്ലോ!

ഞാൻ ആരാണ്?
ഞാൻ എവിടെ നിന്നു വരുന്നു?
അയാൾ ചോദിക്കാറില്ല
ചോദിച്ചിട്ടില്ല
അയാൾക്കതറിയില്ലെന്നെനിക്കറിയാമല്ലോ!
അയാൾക്കതറിയാമെന്നെനിക്കറിയില്ലെന്ന്
അയാൾക്കറിയാമല്ലോ!

സമയം 9.20
ബസ്സു വരുന്നു
ഞങ്ങൾ അന്യോന്യം നോക്കി
പുഞ്ചിരിച്ച്
ബസ്സിൽ കയറുന്നു
ബസ്സ് നീങ്ങുന്നു
പിന്നെ നിൽക്കുന്നു
പിന്നെ നീങ്ങുന്നു
ഞങ്ങൾ ഒരേ സീറ്റിൽ
പുറത്തു നോക്കിക്കൊണ്ടിരിക്കുന്നു.
ഞാൻ സംസാരിക്കുന്നില്ല
സംസാരിക്കാറില്ല
അയാൾക്കെല്ലാമറിയാമെന്നെനിക്കറിയാമെന്ന്
അയാൾക്കറിയാമല്ലോ!
അല്ലെങ്കിൽ
അയാൾക്കൊന്നുമറിയില്ലെന്നെനിക്കറിയില്ലെന്ന്
അയാൾക്കറിയാമെന്നെനിക്കറിയാമല്ലോ!
അയാൾ സംസാരിക്കുന്നില്ല
സംസാരിക്കാ‍റില്ല
എനിക്കൊന്നുമറിയില്ലെന്നയാൾക്കറിയില്ലെന്ന്
എനിക്കറിയാമെന്നയാൾക്കറിയാമല്ലോ!

സമയം 9.50
ബസ്സു നിൽക്കുന്നു
അന്യോന്യം നോക്കി
പുഞ്ചിരിച്ചുകൊണ്ട്
ഞങ്ങൾ
ഇറങ്ങുന്നു
അന്യോന്യം നോക്കി പുഞ്ചിരിച്ചുകൊണ്ട്
ഞങ്ങൾ പിരിയുന്നു

അയാൾ എങ്ങോട്ടു പോകുന്നു?
ഞാൻ ചോദിക്കാറില്ല
ചോദിച്ചിട്ടില്ല
എനിക്കതറിയില്ലെന്നയാൾക്കറിയാമല്ലോ!
അല്ലെങ്കിൽ
എനിക്കതറിയാമെന്നയാൾക്കറിയില്ലെന്ന്
എനിക്കറിയാമല്ലോ!
ഞാൻ എങ്ങോട്ടു പോകുന്നു?
അയാൾ ചോദിക്കാറില്ല
ചോദിച്ചിട്ടില്ല
അയാൾക്കതറിയില്ലെന്നെനിക്കറിയാമല്ലോ!
അയാൾക്കതറിയാമെന്നെനിക്കറിയില്ലെന്ന്
അയാൾക്കറിയാമല്ലോ!

സമയം 4.45
ഞങ്ങൾ 9.50 ലേക്കു മടങ്ങുന്നു
പിന്നെ
ഞങ്ങൾ 9.50 ലേക്കു മടങ്ങുന്നു
ബസ്സു നിൽക്കുന്നു
അന്യോന്യം നോക്കി,പ്പുഞ്ചിരിച്ചുകൊണ്ട്
ഞങ്ങൾ പിരിയുന്നു
ഞങ്ങൾ സുഹ്യത്തുക്കളാണ്
സൌഹ്യദമാണ് കാര്യം.






Friday, June 18, 2010

ആഫ്രിക്ക!ആഫ്രിക്ക!!

ആഫ്രിക്കക്ക് ഒരു അർച്ചനാഗീതം
രവീന്ദ്രനാഥ ടാഗോർ

പരിഷ്ക്യതരുടെ പ്രാക്യതമായ ദുരാഗ്രഹം അവരുടെ
നിർലജ്ജ്മായ
മ്യഗീയതയെ നഗ്നമാക്കി തുറന്നു കാണിച്ചു
നീ കരഞ്ഞു; നിന്റെ കരച്ചിൽ ഞെക്കി ഞെരിക്കപ്പെട്ടു.
കവർച്ചക്കാരുടെ ആണി തറച്ച ചെരുപ്പുകൾ
നിന്റെ അമർഷത്തിന്റെ ചരിത്രത്തിന്മേൽ
മായ്ക്കാനാകാത്ത പാടുകൽ പതിച്ചപ്പോൽ
കാട്ടിലുള്ള നിന്റെ കാൽ‌പ്പാടുകൾ കണ്ണീരിലും ചോരയിലും
കുതിർന്നു മലിനമായി.
ഇന്നു പശ്ചിമ ചക്രവാളത്തിൽ അസ്തമനാകാശം
പൊടി നിറഞ്ഞു കൊടുംകാറ്റുകൊണ്ട് ശ്വാസം മുട്ടുമ്പോൾ
തമോമയമായ ഗുഹയിൽ നിന്നു
പുറത്തേക്കിഴഞ്ഞു വരുന്ന മ്യഗം
ഭയാനകമായ അലർച്ചകൾകൊണ്ട്
പകലിന്റെ മരണം പ്രഖ്യാപിക്കുമ്പോൾ,
ഹേ! അന്ത്യകാല കവേ!വരൂ!
മാനഭംഗം ചെയ്യപ്പെട്ട ആ സ്ത്രീയുടെ വാതിക്കൽ നിന്നുകൊണ്ട്
അവളോട് മാപ്പുചോദിക്കൂ!
രോഗം പിടിപെട്ട ഒരു വൻകരയുടെ 
സ്വബോധമില്ലാത്ത പേപറച്ചിലിനിടയിൽ
അതായിരിക്കട്ടെ അവസാനത്തെ മഹത്തായ വാക്ക്

Wednesday, June 16, 2010

മറഡോണയുടെ മികച്ച ഗോളുകൾ(maradonna goals)

ബ്രസീലിനെ വിറപ്പിച്ച് കൊറിയ കീഴടങ്ങി


Posted on: 16 Jun 2010
എം.പി. സുരേന്ദ്രന്‍


ജൊഹാനസ്ബര്‍ഗ്: ഫുട്‌ബോളിന്റെ ഇരുമ്പു മറയുമായെത്തിയ ഉത്തരകൊറിയ, കിരീട പ്രതീക്ഷയുമായെത്തിയ ബ്രസീലിനെ വിറപ്പിച്ച ശേഷം കീഴടങ്ങി.ഗ്രൂപ്പ് ജി യില്‍ ഒന്നിനെതിരെ രണ്ടു ഗോളുകള്‍ക്കായിരുന്നു ബ്രസീലിന്റെ ജയം.

ഗോള്‍രഹിതമായ ആദ്യ പകുതിക്കു ശേഷം മൈക്കോണ്‍(55-ാം മിനിറ്റ് ), എലാനോ (72-ാം മിനിറ്റ് ) എന്നിവരുടെ ഗോളുകളിലാണ് ബ്രസീല്‍ ലീഡെടുത്തത്.കളി തീരാന്‍ ഒരു മിനിറ്റു ബാക്കി നില്‍ക്കെ ജിന്‍ യുന്‍ നാം ഉത്തരകൊറിയക്കു വേണ്ടി ഒരു ഗോള്‍ മടക്കി. സമനില ഗോളിനായി കൊറിയന്‍ ടീം സമ്മര്‍ദ്ദം ചെലുത്തുന്നതിനിടയിലാണ് ഫൈനല്‍ വിസില്‍ മുഴങ്ങിയത്.

ചൊവ്വാഴ്ച നടന്ന ആദ്യ രണ്ട് മത്സരങ്ങളും സമനിലയില്‍ അവസാനിച്ചു. പാരമ്പര്യത്തിന്റെ പെരുമയുമായെത്തിയ പോര്‍ച്ചുഗലിനെ ഗോള്‍ രഹിത സമനിലയില്‍ പിടിച്ചുകെട്ടി ഐവറികോസ്റ്റ് കരുത്തുകാട്ടി. ശരാശരിയിലൊതുങ്ങിയ പോരാട്ടത്തില്‍ ഇഞ്ചുറി ടൈമിലെ ഗോളില്‍ ന്യൂസീലന്‍ഡ്, സ്ലോവാക്യയെ സമനിലയില്‍ പിടിച്ചു.

ഗ്രൂപ്പ് ജി യില്‍ മുന്‍ലോക ഫുട്‌ബോളര്‍ ക്രിസ്റ്റിയാനോ റൊണാള്‍ഡോ നയിച്ച പോര്‍ച്ചുഗലിനെ സമനിലയില്‍ പിടിക്കാന്‍ കഴിഞ്ഞത് ഐവറികോസ്റ്റിന് നേട്ടമായി.പരിക്കിന്റെ പിടിയിലായിരുന്ന ക്യാപ്റ്റന്‍ ദിദിയര്‍ ദ്രോഗ്ബ അവസാന ഘട്ടത്തിലാണ് ഇറങ്ങിയതെങ്കിലും ആഫ്രിക്കന്‍ ആനകള്‍ കരുത്തു കാട്ടി.

അരങ്ങേറ്റം കുറിച്ച സ്ലൊവാക്യയും രണ്ടാം വട്ടക്കാരായ ന്യൂസീലന്‍ഡുമായുള്ള ഗ്രൂപ്പ് എഫ് മത്സരം ആവേശത്തിലേക്കുയര്‍ന്നില്ല.റോബര്‍ട്ട് വിറ്റേക് 50-ാം മിനിറ്റില്‍ നേടിയ ഗോളില്‍ സ്ലൊവേക്യയാണ് മുന്നിലെത്തിയത്.ഇഞ്ചുറി ടൈമില്‍ പ്രതിരോധനിര താരം വിന്‍സറ്റണ്‍ റീഡ് നേടിയ ഗോളിനാണ് ന്യൂസീലന്‍ഡ് സമനില പിടിച്ചത്.

Tuesday, June 15, 2010

ഏറ്റവും മികച്ച ഇന്ത്യൻ സിനിമ ഏത്?

                                            അപരാജിതോ


 സംവിധാനം,തിരക്കഥ      :സത്യജിത് റായി                                                                                                         
സംഗീതം           :രവിശങ്കർ                                                                ഛായാഗ്രഹണം:സുബ്രതോ മിത്ര                                                                                     സത്യജിത് റായിയുടെ പ്രശസ്തമായ 'അപുത്രയ' ത്തിലെ രണ്ടാമത്തേതായ 'അപരാജിതോ' നിർമ്മിക്കപ്പെട്ടിട്ട് 50 വർഷങ്ങൾ കഴിഞ്ഞെങ്കിലും ഇന്നും പ്രേക്ഷകരെ ആകർഷിച്ചു കൊണ്ടിരിക്കുന്ന ഒരു ക്‌ളാസിക്കാണ്
'അപുത്രയ' ത്തിലെ ആദ്യ ചിത്രമായ 'പഥേർ പാഞ്ചലി'യുടെ തുടർച്ചയായാണ് ഈ ചിത്രം റായി അവതരിപ്പിക്കുന്നത്.സത്യജിത് റായിയുടെ സമർത്ഥമായ ആഖ്യാനപാടവത്തിന്റെ ഉത്തമ ഉദാഹരണമായ ചിത്രം അദ്ദേഹത്തിന്റെ മികച്ച സിനിമകളിലൊന്നാണ്.തങ്ങളുടെ പുത്രിയായ ദുർഗയുടെ മരണശേഷം സ്വന്തം ഗ്രാമം വിട്ട് വാരണാസിയിലേക്ക് ചേക്കേറിയ ഹരിഹറിന്റെയും സർബോജയയുടെയും പുത്രൻ അപുവിന്റെയും കഥ പറയുന്നു, 'അപരാജിതോ' .സന്തോഷം നിറഞ്ഞ ആദ്യ ദിനങ്ങൾ ഹരിഹറിന്റെ പെട്ടെന്നുള്ള മരണത്തോടെ അവസാനിക്കുന്നു.തുടർന്ന് വാരണാസി വിടുന്ന സർബോജയ അപുവിനോടൊപ്പം തന്റെ അമ്മാവന്റെ ഗ്രാമവസതിയിൽ താമസിക്കുന്നു.ഗ്രാമവിദ്യാലയത്തിലെ മികച്ച വിദ്യാർത്ഥിയാകുന്ന അപു കൽക്കത്തയിൽ തുടർ പഠനം നടത്തുന്നതിനായുള്ള സേ്കാളർഷിപ്പ് നേടുന്നു.മനസ്സില്ലാമനസോടെ അപുവിനെ അമ്മ നഗരത്തിലേക്ക് യാത്രയാക്കുന്നു.മഹാനഗരത്തിൽ അപു തന്റെ പഠനം തുടരുന്നതിനിടെ അമ്മ രോഗബാധിതയാകുകയും അപുവിന്റെ അവസാന വർഷ പരീക്ഷക്ക് തൊട്ടുമുൻപ് മരണപ്പെടുകയും ചെയ്യുന്നു.ഗ്രാമത്തിൽ തിരിച്ചെത്തുന്ന അപു ,അമ്മയുടെ ഓർമ്മകളുമായി കൽക്കത്തയിലേക്ക് മടങ്ങുന്നു.


തടഞ്ഞു നിർത്തുന്ന,പുറകോട്ടു വലിക്കുന്ന പാരമ്പര്യവും, മുന്നോട്ടുള്ള(ആധുനിക ചിന്തയിലേക്കും ജീവിതത്തിലേക്കും ഉള്ള) പ്രയാണവും തമ്മിലുള്ള സംഘർഷം വിഷയമാക്കുന്ന ചിത്രം 1920 കളിലെ ഫ്യൂഡൽ ഇന്ത്യയിൽ നിന്നും പുത്തൻ ഇന്ത്യയിലേക്കുള്ള കഥാപുരുഷന്റെ ഗതിയെ ചിത്രീകരിക്കുന്നു. സുബ്രതാ മിത്രയുടെ മനോഹരമായ ഫോട്ടോഗ്രഫിയും പണ്ഡിറ്റ് രവിശങ്കറിന്റെ പശ്ചാത്തല സംഗീതവും ചിത്രത്തിന് മിഴിവേറ്റുന്നു.ചിത്രത്തിലെ വാരണാസി നഗരദൃശ്യങ്ങൾ ചേതോഹരമാണ്.അനിശ്ചിതത്വം നിറഞ്ഞ ഭാവിയിലേക്ക് പശ്ചാത്തലത്തിൽ മുഴകൂന്ന ഇടിമുഴക്കത്തോടെയുള്ള അപുവിന്റെ പ്രയാണരംഗത്തോടെ അവസാനിക്കുന്ന സിനിമ നമുക്ക് സമ്മാനിക്കുന്നത് മികച്ച ചലചിത്രാനുഭവമാണ്.


ഫുട്‌ബോള്‍ ലഹരിയുടെ ചന്ദ്രോദയം

ഫുട്‌ബോള്‍ ലഹരിയുടെ ചന്ദ്രോദയം
Posted on: 06 Jun 2010

ശ്രീകാന്ത് കോട്ടക്കല്‍


ആരവങ്ങള്‍ ആഫ്രിക്കയിലാണെങ്കിലും പന്തുരുളുമ്പോള്‍ മലബാറിന്റെ നെഞ്ച് തുടിക്കുകയാണ്.
കളിക്കമ്പം ഇവിടെ ഒരു ജനതയുടെ കലയും സംസ്‌കാരവും, മതവും ഉന്നതമായ ഉന്മാദവുമായി ഉയരുന്നു. അതിന്റെ ആള്‍രൂപമായി ഇങ്ങനെയൊരാള്‍- 'ഓട്ടോ ചന്ദ്രന്‍'.
കേരളത്തിന്റെ ഗാലറികളില്‍ പെരിയ മീശയും പെരുമ്പറകളുമായി നിറഞ്ഞുനിന്ന കോഴിക്കോടന്‍
ഫുട്‌ബോള്‍ഭ്രാന്തിന്റെ പ്രതീകം അങ്ങനെ തലമുറകളിലൂടെ സുവര്‍ണജൂബിലിയിലെത്തുന്നു.


കളിഭ്രാന്തിന്റെ ബ്ലാക്ക് ആന്‍ഡ് വൈറ്റ് കാലമായിരുന്നു അത്... കോഴിക്കോട് മാനാഞ്ചിറ മൈതാനിയിലെ പൊടിമണ്‍ കളത്തിലേക്ക് ദേശാതിരുകള്‍ക്കപ്പുറത്തുനിന്ന് കാല്‍പ്പന്തുകളിക്കാര്‍ വന്ന കാലം. അവരുടെ കാലുകളുടെ കരുത്തും അവയിലൊളിപ്പിച്ച ജാലവും കാണാന്‍ കോരപ്പുഴയും ചാലിയാറും കടന്ന് പുരുഷാരമെത്തി. കോലത്തുനാട്ടിലെയും കുറുമ്പ്രനാട്ടിലെയും ഏറനാട്ടിലെയും വള്ളുവനാട്ടിലെയും വഴികള്‍ കാവുത്സവങ്ങളുടെയും വേലപൂരങ്ങളുടെയും കാലം പോലെ നിറഞ്ഞൊഴുകി മാനാഞ്ചിറയിലെത്തി ഒരു പന്തിനു ചുറ്റും സംഗമിച്ചു.
ആ നാളുകളിലെ സായാഹ്നങ്ങളിലൊന്നില്‍, ഫിഷറീസ് സ്‌കൂളിലെ നാലുകുടിപ്പറമ്പില്‍ ചന്ദ്രന്‍ എന്ന നാലാം ക്ലാസുകാരന്‍ സ്ലേറ്റുകൊണ്ട് മുഖം മറച്ച് ക്ലാസ്സില്‍നിന്നു മുങ്ങി. ബട്ടണടര്‍ന്ന് ഇടയ്ക്കിടെ അഴിഞ്ഞുപോയിരുന്ന ട്രൗസര്‍ ഒരു കൈകൊണ്ട് കുത്തിപ്പിടിച്ച് അവന്‍ മുന്നില്‍ക്കണ്ട മണല്‍ വഴികളിലൂടെയും കോഴിക്കോടിന്റെ ഇടുങ്ങിയ ഇടവഴികളിലൂടെയും തീവണ്ടിപ്പാളങ്ങള്‍ കടന്നും ഓടി. ഓടിയോടി മാനാഞ്ചിറയിലെത്തി. അവിടെ മൈതാനത്തെച്ചുറ്റി ആകാശത്തോളം ഉയരത്തില്‍ മനുഷ്യമതില്‍. പരല്‍മീന്‍ കടലിലേക്ക് തെന്നിയൊഴുകും പോലെ ആ കുട്ടി ഒരു പഴുതിലൂടെ അകത്തുകടന്ന് തറയിലിരുന്നു.
കാറ്റെടുത്തെറിയുന്ന തിരച്ചാര്‍ത്തുകളെപ്പോലെയുലയുന്ന കാണികളുടെ ആരവങ്ങള്‍ക്കിടയില്‍ നിന്ന് ചില പേരുകള്‍ അവനും കേട്ടു: ചെങ്കാസി, ഹുസൈന്‍ കില്ലര്‍, മേവാലാല്‍... മക്രാന്‍സ് പാകിസ്താന്‍, ഈസ്റ്റ്ബംഗാള്‍, കറാച്ചി കിക്കേഴ്‌സ്... വശങ്ങളില്‍ നിന്ന് വശങ്ങളിലേക്ക് വളഞ്ഞുപുളഞ്ഞ് പറന്നുപോകുന്ന പന്ത്, അതിനെ ഒരു മഞ്ഞുതരിയുടെ ലാഘവത്തോടെ നെഞ്ചിലേക്കൊതുക്കുന്ന കളിക്കാര്‍, എതിര്‍വലയിലേക്ക് ഒരുവെടിച്ചില്ലുപോലെ മൂളിപ്പോകുന്ന ഷോട്ട്, വലയ്ക്കു മുന്നില്‍ ഗോളിയുടെ മഴവില്‍ നടനം... ആ കുട്ടിയ്ക്ക് അതൊരു പുതിയ അനുഭവമായിരുന്നു. പതുക്കെപ്പതുക്കെ തുടങ്ങിയ കളി പൊരുതിപ്പൊരുതി അന്ത്യനിമിഷങ്ങളോടടുത്തു. പെട്ടെന്ന്, തുല്യതയുടെ തുമ്പത്തുവെച്ച് തഞ്ചാവൂര്‍ കിട്ടുവിന്റെ ഒരു ഹെഡ്ഡര്‍. മക്രാന്‍സിന്റെ വല വിറച്ചു. മീന്‍ വലയില്‍ പെരുമീന്‍ പെട്ടതുപോലെ. ഒറ്റനിമിഷം കൊണ്ട് മൈതാനത്തെപ്പൊതിഞ്ഞുനിന്ന പുരുഷാരം കുമിളയുടഞ്ഞ് ചുറ്റും പടര്‍ന്നു. ആകാശമാകെ ഇന്ത്യയ്ക്കും ഈസ്റ്റ്ബംഗാളിനും ജയ് വിളികള്‍. ആരവങ്ങളോടെ അവര്‍ തെരുവുകളിലേക്കൊഴുകി. അതിനിടയിലൂടെ തട്ടിയും തടഞ്ഞും ഇടയ്‌ക്കൊക്കെ വീണും വീണ്ടുംവീണ്ടും എഴുന്നേറ്റും അവന്‍ അന്തിമയങ്ങുമ്പോള്‍ വീട്ടിലെത്തി. അപ്പോഴേക്കും അവന്റെ കൈയിലെ സ്ലേറ്റ് ഉടഞ്ഞിരുന്നു.

അന്നുരാത്രി അവന്റെ സ്വപ്നങ്ങളില്‍ ബൂട്ടിട്ട കാലുകള്‍ നൃത്തം ചെയ്തു. പിറ്റേന്നുമുതല്‍ അവന്‍ സ്‌കൂളിലേക്ക് ഓടുന്നതിനേക്കാള്‍ പന്തിനു പിറകെ ഓടിത്തുടങ്ങി. മക്കാച്ചി മൈതാനിയില്‍ച്ചെന്ന് കളിപഠിച്ചു. കാല്‍ത്തുമ്പുകൊണ്ട് കണ്ണില്‍ മണ്ണുവാരിയിട്ട് ഗോളടിക്കുന്ന കടല്‍ത്തീര ഫുട്‌ബോളിലെ പൂഴിക്കടകനും കള്ളക്കോലുകളും പഠിച്ചു. പതുക്കെപ്പതുക്കെ കോഴിക്കോടിന്റെ മറ്റു മൈതാനങ്ങളിലേക്ക് അവന്റെ കളികള്‍ നീണ്ടു. കളി, ജീവിതം തന്നെയാക്കാന്‍ അവന്‍ കൊതിച്ചു. പക്ഷേ ചായക്കച്ചവടം നടത്തിയിരുന്ന ദരിദ്രപിതാവിന് മകന് വേണ്ട കളിക്കോപ്പുകളൊന്നും ഒരുക്കിക്കൊടുക്കാന്‍ കഴിഞ്ഞില്ല. അങ്ങനെ പതിനെട്ടാം വയസ്സില്‍ അവന്‍ പതിയെപ്പതിയെ മൈതാനങ്ങളില്‍നിന്നു പിന്‍വലിഞ്ഞു. ഒരു ഓട്ടോറിക്ഷ വാങ്ങി രാപ്പകലോടി ഓട്ടോ ചന്ദ്രനായി. പക്ഷേ, ഉള്ളിലെവിടെയോ ഒരു കദനം ഉരുകിനിന്നു.

അപ്പോഴേക്കും കളി ഒരു മാറാവ്യാധിയായി ചന്ദ്രന്റെ കോശങ്ങളില്‍ പടര്‍ന്നിരുന്നു. അവിടെത്തുടങ്ങുന്നു കളങ്ങളില്‍നിന്നു കളങ്ങളിലേക്ക് കിക്കോഫുകള്‍ തേടിയുള്ള യാത്രകള്‍. കോയമ്പത്തൂര്‍, ബാംഗ്ലൂര്‍, ഡല്‍ഹി... പിന്നെ മലപ്പുറത്തെയും വടക്കേ മലബാറിലെയും സെവന്‍സിന്റെ ദേശവിളക്കുകള്‍. ആ അലച്ചിലിനൊപ്പം ചന്ദ്രന്റെ മുഖത്ത് മീശ പെരുത്തു. മീശയ്‌ക്കൊപ്പം ആശയും ആവേശവും കലശലായി. പന്തുരുളുന്നിടത്തെല്ലാം ഗാലറിയില്‍ അയാളൊരു അടയാളക്കൊടിമരമായി ആര്‍ത്തുവിളിച്ചു. അങ്ങനെ ഓട്ടോചന്ദ്രന്‍ എന്ന അപൂര്‍വനായ കാണി പിറന്നു.

ഒഴിവുസമയങ്ങളെ ഒഴുക്കിക്കളയാനുള്ള നേരംപോക്കല്ല ഓട്ടോചന്ദ്രന് ഫുട്‌ബോള്‍. അയാള്‍ക്കത് സ്വപ്നവും ജീവിതവുമാണ്. സൂര്യനു ചുറ്റുമല്ല, ഒരു ഫുട്‌ബോളിനു ചുറ്റുമാണ് ഭൂമി കറങ്ങുന്നത് എന്ന് വിശ്വസിക്കാനാണ് ചന്ദ്രനിഷ്ടം. മഴയും മഞ്ഞും വേനലും മാറിവരുന്നതല്ല ചന്ദ്രന്റെ ചുമരിലെ കലണ്ടര്‍. സന്തോഷ് ട്രോഫിയും ഡ്യുറാന്റ്കപ്പും നെഹ്രുകപ്പും നാഗ്ജിയും റോവേഴ്‌സ്‌കപ്പുമെല്ലാമാണ് ആ കലണ്ടറിനെ പകുക്കുന്ന ഋതുക്കള്‍.

നാഗ്ജിയും നെഹ്രു കപ്പുമാണ് ഓട്ടോ ചന്ദ്രനെ കാണികള്‍ക്കിടയിലെ കണിക്കൊന്നയാക്കിയത്. അക്കാലത്ത് കോഴിക്കോട് കോര്‍പ്പറേഷന്‍ സ്റ്റേഡിയത്തിന്റെ പടിഞ്ഞാറുവശത്തെ മുളഗാലറിയില്‍ കളി തുടങ്ങുംമുമ്പേ ചന്ദ്രനും സംഘവും എത്തിയിരിക്കും. അപ്പുച്ചെട്ടിയാരും മാധവനും ഹുസൈനും വിശ്വനുമെല്ലാമടങ്ങിയ ആ സംഘത്തിന്റെ കൈയില്‍ ചെണ്ടയും കുഴലും പലപല ശബ്ദത്തിലുള്ള വാദ്യങ്ങളുമുണ്ടായിരിക്കും. കളമുണര്‍ന്ന് കളിക്കാര്‍ കാറ്റുപിടിച്ച പട്ടംപോലെ വളഞ്ഞുംപുളഞ്ഞും ഓടിത്തുടങ്ങുമ്പോഴേക്കും പട്ടച്ചരട് ചന്ദ്രനും സംഘവും കൈക്കലാക്കിയിരിക്കും. ഉന്നം പിഴയ്ക്കാത്ത കമന്റുകളിലൂടെ, പെരുമ്പറകളിലൂടെ അവര്‍ കളിയെ കൊഴുപ്പിക്കുകയും കൊതിപ്പിക്കുന്ന അഴകുകളിലേക്ക് കൊണ്ടുപോകുകയും ചെയ്യും. മൈനസ്​പാസുകാരെ കൂവിക്കൂവി അറബിക്കടല്‍ കടത്തും. ഗോളടിക്കുന്നവരെ ദൈവങ്ങളാക്കും. ലക്ഷം പേര്‍ ചുറ്റുമിരുന്ന് ആര്‍പ്പുവിളിച്ചാലും ചന്ദ്രന്‍ ചോദിക്കും: ''എന്നുടെ ഒച്ച കേട്ടുവോ വേറിട്ട്...?'' കോളുകൊണ്ട കടലുപോലുള്ള കാഴ്ചക്കാരും അതിശയിപ്പിക്കുന്ന കളിയും കപ്പടാമീശയുമായി ഓട്ടോചന്ദ്രന്റെ സാന്നിധ്യവുമായപ്പോള്‍ കോഴിക്കോടിന് കാല്‍പ്പന്തുകളി ഒരു കോക്‌ടെയിലുപോലെ അധികലഹരി പകര്‍ന്നു.

തൊണ്ണൂറ് മിനിറ്റില്‍ തീരുന്നതല്ല ചന്ദ്രന്റെ കളിക്കമ്പം. അത് ഫൈനല്‍ വിസിലും കഴിഞ്ഞ് കളത്തിന് പുറത്തുപോകുന്നു. നഗരത്തില്‍ ടൂര്‍ണമെന്റുകള്‍ എത്തിയാല്‍ ചന്ദ്രന്റെ 'കെ.എല്‍.ഡി. 5373' നമ്പര്‍ ഓട്ടോ കളിക്കാര്‍ക്കും കളിക്കമ്പക്കാര്‍ക്കും മാത്രമുള്ളതാണ്. ബി.എസ്.എഫിന്റെ ജോഗീന്ദ്രര്‍ സംഘയുടെയും ജെ.സി.ടി. ഫഗ്‌വാരയുടെ ഇന്ദര്‍സിങ്ങിന്റെയും മഖന്‍സിങ്ങിന്റെയും സുബ്രതോഭട്ടാചാര്‍ജിയുടെയുമെല്ലാം നഗരത്തിലെ ഇഷ്ടവാഹനം ചന്ദ്രന്റെ ഓട്ടോയായിരുന്നു. അതില്‍ക്കയറി അവര്‍ ബോംബെ ഹോട്ടലിലെ ബിരിയാണിയും പാരഗണിലെ മീന്‍കറിയും കഴിക്കാന്‍ പോകും. മോഹന്‍ബഗാന്‍ ക്യാപ്റ്റന്‍ സുബ്രതോഭട്ടാചാര്‍ജിക്ക് കളിക്കുമുമ്പുള്ള കാളീപൂജയ്ക്കുവേണ്ടി പൂക്കളും കര്‍പ്പൂരവും ചന്ദനത്തിരിയും വാങ്ങാന്‍ മാരിയമ്മന്‍ കോവിലിനടുത്തുള്ള പൂജാസ്റ്റോറുകളിലേക്ക് കുതിക്കുന്നതും ചന്ദ്രന്റെ ഓട്ടോതന്നെ. ബീച്ച്‌ഹോട്ടലില്‍ മണിക്കൂറുകള്‍ നീണ്ടുനില്‍ക്കുന്ന കാളീപൂജയ്ക്ക് പ്രധാന സഹായി ചന്ദ്രനാണ്. കോര്‍പ്പറേഷന്‍ സ്റ്റേഡിയത്തില്‍ കളിക്കാര്‍ക്ക് പരിക്കേറ്റാല്‍ അവരെയും കൊണ്ട് തൊട്ടപ്പുറത്തുള്ള കുമാരന്‍ ഗുരിക്കളുടെ കളരിയിലേക്കോടുന്ന ആംബുലന്‍സാവും ചിലപ്പോള്‍ ചന്ദ്രന്റെ ഓട്ടോ.

ഒഴിവുസമയങ്ങളെ ഒഴുക്കിക്കളയാനുള്ള നേരംപോക്കല്ല ഓട്ടോചന്ദ്രന് ഫുട്‌ബോള്‍.
അയാള്‍ക്കത് സ്വപ്നവും ജീവിതവുമാണ്. സൂര്യനു ചുറ്റുമല്ല, ഒരു ഫുട്‌ബോളിനു
ചുറ്റുമാണ് ഭൂമി കറങ്ങുന്നത് എന്ന് വിശ്വസിക്കാനാണ് ചന്ദ്രനിഷ്ടം



കളിഭ്രാന്തുമായി കളങ്ങളില്‍നിന്ന് കളങ്ങളിലേക്കലയുമ്പോള്‍ തന്റേതായി എന്തെങ്കിലും ഒരു സമ്മാനം മിക്ക ടൂര്‍ണമെന്റുകള്‍ക്കുമായി ചന്ദ്രന്‍ കാത്തുവെക്കുമായിരുന്നു. ആദ്യം ഗോളടിക്കുന്നയാള്‍ക്ക് ആയിരത്തൊന്നുരൂപ, ഏറ്റവും നല്ല കളിക്കാരന് രണ്ടായിരം... ''ഓട്ടോയോടിച്ച് നടക്കുന്ന കാലത്തും ഞാനീ സമ്മാനവിതരണം മുടക്കിയിട്ടില്ല, മുണ്ടുമുറുക്കിയുടുത്ത് ഞാനാ പണം കമ്മിറ്റിക്ക് എത്തിച്ചുകൊടുക്കും. പകലന്തിയോളം പണിയെടുത്ത് വീട്ടില്‍ അരിക്കാശ് എത്തിച്ചുകൊടുക്കുന്ന ആനന്ദം എനിക്കത് നല്‍കുന്നു.'' സംഘാടകരുമായും കളിക്കാരുമായും നല്ല ബന്ധമുണ്ടെങ്കിലും ചന്ദ്രന്‍ ഒരിക്കലും പാസിന്റെ ഔദാര്യത്തില്‍ കളി കണ്ടിട്ടില്ല. എല്ലാ കളികളിലും തനിക്കുള്ളതു മാത്രമല്ല കുറച്ചധികം ടിക്കറ്റും ചന്ദ്രന്‍ കൈയില്‍ കരുതും. ടിക്കറ്റു കിട്ടാതെ വലയുന്ന തന്നേപ്പോലുള്ള കമ്പക്കാര്‍ക്ക് പിന്നീടത് സൗജന്യമായി നല്‍കും. കളി, കമ്പം മാത്രമല്ല പലരുടെയും കഞ്ഞികുടി കൂടിയാണ് എന്ന് ചന്ദ്രനറിയാം. അതില്‍ പാസിന്റെ പാറ്റയിടരുത്.
സ്വന്തം തലക്കുറിയേക്കാളും റേഷന്‍കാര്‍ഡിനേക്കാളും പാസ്‌പോര്‍ട്ടിനെ ചന്ദ്രന്‍ സ്‌നേഹിക്കാന്‍ തുടങ്ങിയത് ലോകകപ്പ് കാരണമാണ്. ലോകകപ്പടുക്കുമ്പോള്‍ ഓരോ തവണയും ഈ കാണി പാസ്‌പോര്‍ട്ടെടുത്ത് പൊടിതട്ടിവെച്ചിരുന്നു. ''ഓട്ടോ ഓടിക്കുന്ന കാലത്തുതന്നെ ഞാന്‍ പാസ്‌പോര്‍ട്ടെടുത്തുവെച്ചിരുന്നു. കൈയിലെ കാശെടുത്ത് പോകാനുള്ള പാങ്ങില്ല. പലതവണ പലവിധത്തില്‍ ശ്രമിച്ചുനോക്കി. നടന്നില്ല. ബ്രസീലും അര്‍ജന്റീനയും ഏറ്റുമുട്ടുന്ന ഗാലറിയിലിരുന്ന് ഒന്നാര്‍ത്തു വിളിച്ചിട്ടുവേണം എനിക്ക് മരിക്കാന്‍''.


മറുമരുന്നില്ലാത്ത കളിഭ്രാന്ത്


ഒരുമാതിരിപ്പെട്ട ഉന്മാദങ്ങള്‍ക്കെല്ലാം ചികിത്സ കണ്ടുപിടിച്ച കോഴിക്കോട്ടെ കുതിരവട്ടം ആസ്​പത്രിയ്ക്ക് മലബാറിന്റെ ഫുട്‌ബോള്‍ ഭ്രാന്തിനുമാത്രം ഇതുവരെ മറുമരുന്ന് കണ്ടുപിടിക്കാന്‍ സാധിച്ചിട്ടില്ല. അത് ജീനുകളില്‍നിന്ന് ജീനുകളിലേക്ക് തലമുറകളിലൂടെയുള്ള തുടര്‍ പ്രവാഹമാണ്. ഇടയില്‍ തടയണകളില്ലാതെ അത് ഒഴുകിക്കൊണ്ടേയിരിക്കുന്നു. അതിലെ തിളക്കമുള്ള കണ്ണികളിലൊന്നാണ് ഓട്ടോ ചന്ദ്രന്‍.
ഓരോ വേനലിലും കൊയ്‌തൊഴിയുന്നതോടെ മലപ്പുറത്തെയും കോഴിക്കോട്ടെയും വടക്കേ മലബാറിലേയും വയലുകള്‍ കുമ്മായവരകളണിഞ്ഞ് കളിയ്‌ക്കൊരുങ്ങുന്നു. പിന്നെ ഈ മണ്ണിലൂടെയുള്ള യാത്രകള്‍ ഫുട്‌ബോള്‍ മാത്രം കണ്ടുകൊണ്ടുള്ളതാണ്. ആരവങ്ങളും വിസിലടികളും സന്ധ്യകളെ മുഖരിതമാക്കുന്നു, ഫ്‌ളഡ്‌ലിറ്റുകള്‍ വെളിച്ചം വിതറുന്നു. ലോകകപ്പ് നാലുവര്‍ഷം കൂടുമ്പോള്‍ മാത്രം നടക്കുമ്പോള്‍ ഓരോ സീസണും ഇവര്‍ക്ക് ലോകകപ്പാണ്, ക്ലബ് ഫുട്‌ബോളിന്റെ വാശിയേറിയ കുടിപ്പകകള്‍ കുടിച്ചാണ് മമ്പാട്ടെയും അരിക്കോട്ടേയും കുട്ടികള്‍ ഇപ്പോഴും വളരുന്നത്. ആ വാശിയെ വളര്‍ത്തിവളര്‍ത്തി അവര്‍ ഇന്ത്യന്‍ ടീമിലേക്കുവരെ കയറിപ്പോകുന്നു.
''സെവന്‍സുകള്‍ തേടി ഞാന്‍ ഇപ്പോഴും അലയാറുണ്ട്. അതിന്റെ നാടന്‍ ചൂരും വാശിയും ഒന്നു വേറെത്തന്നെയാണ്. അപാരന്മാരായ ചില കളിക്കാരെ ഈ വയലുകളില്‍ നേര്‍ക്കുനേര്‍ കാണാന്‍ സാധിക്കും. പലപ്പോഴും അവരെ ആരും വേണ്ടവിധത്തില്‍ കണ്ടെടുക്കാറില്ല എന്നതാണ് സത്യം'' -ചന്ദ്രന്‍ പറയുന്നു.

വീണ്ടും ഒരു ലോകകപ്പ് വരുമ്പോള്‍ മലബാറിന്റെ വഴികള്‍ കട്ടൗട്ടുകളാലും കമന്റുകളും യുദ്ധവാക്യങ്ങളും നിറഞ്ഞ കൂറ്റന്‍ ഫ്‌ളക്‌സുകളാലും കൊടിതോരണങ്ങളാലും നിറഞ്ഞുകഴിഞ്ഞു. മുഖങ്ങള്‍ പലപല ചായങ്ങളണിഞ്ഞുതുടങ്ങി. പന്തയത്തിന്റെ പോരുകള്‍ തുടങ്ങി. കാരണം, കളി കടലിനപ്പുറത്താണെങ്കിലും കമ്പവും കണ്ണീരും ഈ മണ്ണിലാണ്, പിടയ്ക്കുന്നത് ഇവരുടെ ചങ്കാണ്- ഫിഫ ഇതൊന്നുമറിയുന്നില്ലെങ്കിലും.

Sunday, June 13, 2010

അർജന്റീനയുടെ ആദ്യ വിജയം


പ്രതീക്ഷിക്കാം, ഇവരെ
Posted on: 13 Jun 2010,


ജോഹനാസ്ബര്‍ഗ്:ലോകകപ്പിന്റെ താരമാകാനുള്ള പാതയിലാണെന്ന് തെളിയിച്ച പ്രകടനത്തോടെ മെസ്സി. ആക്രമണ ഫുട്‌ബോളിന്റെ സുന്ദര നിമിഷങ്ങളുമായി അര്‍ജന്റീന. വിജയം ഒരു ഗോളിലൊതുങ്ങിയെങ്കിലും ആശിച്ച തുടക്കമാണ് ഇതിഹാസതാരം ഡീഗോ മാറഡോണയുടെ ടീമിന് പത്തൊമ്പതാം ലോകകപ്പില്‍ കിട്ടിയത്.

വിജയത്തിനുള്ള ക്രെഡിറ്റ് പ്രതിരോധ നിരയിലെ വിശ്വസ്തന്‍ ഗബ്രിയേല്‍ ഹെയ്ന്‍സിക്കാണെങ്കിലും മത്സരത്തിലെ താരം സാക്ഷാല്‍ മെസ്സി തന്നെ.ഗോളെന്നുറച്ച ആറവസരങ്ങളാണ് മെസി സൃഷ്ടിച്ചത് .മെസ്സിയുടെ ദൗര്‍ഭാഗ്യവും ഒപ്പം നൈജീരിയന്‍ ഗോളി വിന്‍സന്റ് എന്‍യീമയുടെ മിന്നുന്ന സേവുകളുമാണ് താരത്തെ ഗോള്‍ നേടുന്നതില്‍ നിന്നു തടഞ്ഞത്. അവസരങ്ങള്‍ പ്രയോജനപ്പെടുത്തിയിരുന്നെങ്കില്‍ ആറു ഗോളിനെങ്കിലും അര്‍ജന്റീന ജയിക്കേണ്ടതായിരുന്നു.

ആദ്യ പകുതിയില്‍ അര്‍ജന്റീനയുടെ ആക്രമണത്തിന്റെ മലവെള്ളപ്പാച്ചിലായിരുന്നു.ഫിനിഷിങിലെ ദൗര്‍ഭാഗ്യമാണ് അവരുടെ ഗോള്‍പ്പട്ടിക ഉയര്‍ത്താതിരുന്നത്.ഇരു പകുതികളിലായി മൂന്നവസരങ്ങള്‍ നഷ്ടപ്പെടുത്തിയ ഗോണ്‍സാലാ ഹിഗ്വയിനായിരുന്നു അര്‍ജന്റീനാ നിരയിലെ വില്ലന്‍മാരില്‍ മുമ്പന്‍.

രണ്ടാം പകുതിയില്‍ അര്‍ജന്റീനയുടെ പ്രതിരോധത്തെ വിറപ്പിക്കാന്‍ നൈജീരിയയ്ക്കായി.കാലു ഉച്ചെയും യാക്കൂബുവും പകരക്കാരന്‍ ഒബാഫെമി മാര്‍ട്ടിന്‍സും അവസരങ്ങള്‍ നഷ്ടപ്പെടുത്തിയത് നൈജീരിയക്ക് തിരിച്ചടിയായി.മുന്നേറ്റ നിരയില്‍ മെസ്സിക്കു പങ്കാളികളായി ഹിഗ്വയിനെയും കാര്‍ലോസ് ടെവസിനെയുമാണ് മാറഡോണ ആദ്യ ഇലവനില്‍ ഇറക്കിയത്. കഴിഞ്ഞ സീസണില്‍ ഇവര്‍ മൂന്നു പേരും കൂടി അടിച്ചു കൂട്ടിയത് 105 ഗോളുകളാണ്.ആക്രമണത്തിലൂടെ നൈജീരിയയെ തുരത്താമെന്ന മാറഡോണയുടെ തീരുമാനം ശരിയാണെന്ന തുടക്കം മുതലെ മെസ്സിയും സംഘവും തെളിയിച്ചു.

നാലാം മിനിറ്റില്‍ തന്നെ അര്‍ജന്റീന മുന്നിലെത്തേണ്ടതായിരുന്നു. നൈജീരിയന്‍ പ്രതിരോധനിരയ്ക്കിടയിലൂടെ നൃത്തച്ചുവടുമായി മുന്നേറി മെസ്സി നല്‍കിയ പാസ്സ് തട്ടി വലയിലാക്കേണ്ട ജോലിയേ ഹിഗ്വയിനുണ്ടായിരുന്നുള്ളു. റയല്‍ മാഡ്രിഡിനു വേണ്ടി മിന്നുന്ന ഗോളുകള്‍ കഴിഞ്ഞ സീസണില്‍ നേടിയ താരത്തിന്റെ ഷോട്ട് പുറത്തേക്കാണ് പോയത്. ലോകകപ്പെന്ന വമ്പന്‍ വേദിയുടെ സമ്മര്‍ദ്ദം ഹിഗ്വയ്‌നെ ബാധിച്ചെന്നു തെളിയിക്കുന്നതായിരുന്നു തുടര്‍ന്നുള്ള താരത്തിന്റെ പ്രകടനം.

ഹിഗ്വയിന്റെ പിഴവിന് രണ്ടു മിനിറ്റിനുള്ളില്‍ തന്നെ അര്‍ജന്റീന പ്രായശ്ചിത്തം ചെയ്തു. മെസ്സിയുടെ ഗോളെന്നുറച്ച ഷോട്ട് ഗോളി എന്‍യീമ തട്ടിയകറ്റി. ഇതെത്തുടര്‍ന്ന ലഭിച്ച കോര്‍ണറാണ് ഗോളിനു വഴിതെളിച്ചത്.മാഞ്ചസ്റ്റര്‍ യുണൈറ്റഡിന്റെ രണ്ടു മുന്‍ താരങ്ങളായിരുന്നു ഗോളിനു പിന്നില്‍ . സെബാസ്റ്റ്യന്‍ വെറോണ്‍ ,നൈജീരിയയുടെ പ്രതിരോധക്കോട്ടയെ ഒഴിവാക്കി ബോക്‌സിനുള്ളിലേക്ക് പന്ത് ഉയര്‍ത്തിയടിച്ചു. ഓടിയെത്തിയ ഹെയ്ന്‍സി മുഴുനീളന്‍ ഹെഡ്ഡറിലൂടെ പന്ത് പോസ്റ്റിന്റെ മൂലയിലെത്തിച്ചു.

ഗോളി എന്‍യീമയുടെ അസാധ്യമായ രക്ഷപ്പെടുത്തലുകളാണ് നൈജീരിയയുടെ തോല്‍വി മാന്യതയുള്ളതാക്കിയത്. നൈജീരിയന്‍ പ്രതിരോധക്കോട്ടയ്ക്കിടയിലൂടെ മെസ്സി തൊടുത്ത പൊള്ളുന്ന ഷോട്ട് എന്‍യീമ പറന്നിറങ്ങി തട്ടിക്കളഞ്ഞത് അവിശ്വസനീയതയോടെ നോക്കി നില്‍ക്കാനേ മാറഡോണയ്ക്കു പോലുമായുള്ളു.ഹിഗ്വയിനും എയ്ഞ്ചല്‍ ഡി മരിയയുമാണ് മാറഡോണയുടെ പ്രതീക്ഷയക്കൊത്തുയരാതെ പോയത്. മുന്നേറ്റ നിരയില്‍ യാതൊരു പദ്ധതികളുമില്ലാതെ കളിച്ചതിനാലാണ്.അര്‍ജന്റീനയുടെ ദുര്‍ബ്ബലമായ പ്രതിരോധത്തെ പരീക്ഷിക്കാന്‍ നൈജീരിയക്ക് കഴിയാതെ പോയത് .

വാക്കേ വാക്കേ കൂടെവിടെ? ഒളിതിങ്ങും തൂവലിന്‍ തുഞ്ചത്ത്.

വാക്കേ വാക്കേ കൂടെവിടെ?

ആരാരുടെയോ തന്ത
മരണപ്പെട്ടാൽ,അതു കേട്ടാൽ
നിരണത്തിലും നതോന്നതയിലും
നിറഞ്ഞു കവിഞ്ഞു കരയും
കരുവല്ല,കണ്ണീരല്ല
എല്ലും പല്ലുമുള്ള മലയാളവാക്ക്

ഇടവപ്പാതിമഴയിൽ
ഇടനാഴിനടയിൽ
ഇറുകിച്ചടഞ്ഞു വാഴും
ഇട്ടിവേശി നേത്യാരമ്മയ്ക്ക്
രണ്ട് മൂന്നക്കി മുറുക്കാൻ
വിണ്ട ചുണ്ട് ചുവപ്പിക്കാൻ
തമ്പുരാനും നമ്പൂതിരിയും
തന്തപ്പട്ടരുമൊന്നിച്ച്
ഇടിച്ചു വെച്ച പാക്കല്ല
ഇടിത്തീ വെടിക്കും വാക്ക്

ചുടുക്കാപ്പിക്കടയിൽ
ചുമ്മാതിരിക്കും ചുപ്പാമണിയന്
തുടരനെഴുതിത്താളിൽ വിളമ്പാൻ
മെദുവടയല്ലെടോ മലയാളവാക്ക്

വാനൊലിയാലയത്തിൽ
വഷളൻ വെടികൾ വെളിയിൽ വിട്ട്
അകലെയിരിക്കും മാളോരുടെ
ചെറുചെവിയിൽ ചൊറി വിതറാൻ
തരപ്പെടുത്തിയ താപ്പല്ല
തപ്പിലും മപ്പിലും വീർപ്പായ്
വിടർന്നു തുടം വായ്ച്ച മലയാളവാണി

മുഖമില്ലാത്ത നടികൾക്ക് 
മുലയും മൂടും കുലുക്കാൻ 
ഇളിച്ചിവായന്മാരീണം കൂട്ടി
ത്തുളിക്കും മെഴുക്കല്ല
പാണന്റ്റെ ഉടുക്കിലും
പാടത്തിൻ മുടുക്കിലും
പാടിയാടിയ പുന്നാര വാക്ക്

മനസ്സിലെയതിസാരത്താൽ
മന്ത്രിമാരുരതൂറ്റുമ്പോൾ
അതും പെറുക്കി,യധിപന്റെ
മുഞ്ഞിമൊഴിയും പിഴിഞ്ഞൊഴിച്ച്
പത്രത്തിലുടച്ചു ചേർക്കാൻ
പറ്റും പയറ്റു മണിയല്ല
പറ്യന്റെ ചെണ്ടയിലും
ഉറയുന്ന തൊണ്ടയിലും
ഉയരം കൊണ്ടുയിർ പെറ്റ്
ഊറ്റമൂട്ടിയ നമ്മുടെ വാക്ക്

വാക്കേ വാക്കേ കൂടെവിടെ?
വളരുന്ന നാവിന്റെ കൊമ്പത്ത്
വാക്കേ വാക്കേ കൂടെവിടെ?